娛樂偵訊
受惠高層執位 江美儀陳敏之解凍
無綫戲劇製作部總監梁家樹（ Tommy）去年二月離巢後，曾勵珍一統天下， Tommy馬房愛將無運行，其中江美儀、陳敏之更被掟入雪櫃接近一年冇劇開，無綫上月再變天，珍姐失勢，對頭綜藝科總監余詠珊大權在握，為收買人心拓展版圖，安排江美儀、陳敏之做節目，唔使再做凍肉。
八個月冇開工
一三年，江美儀憑《衝上雲霄 II》方芮嘉（ Head姐）一角，奪得「最佳女配角」，去年底與陳敏之合作完《性在有情》後，便再冇工開。
「美儀同敏之都係 Tommy嘅人，珍姐話晒事後， Tommy派系嘅御用愛將，全部冇運行，《性在有情》舊年十一月開，今年二月煞科，之後到而家都未有嘢做，八個幾月冇劇開，人間蒸發一樣。」一名無綫人透露。
據了解，江美儀另一「罪狀」是俾意見。
「公司有經驗嗰班編劇都走晒，啲新嘅又未得，開劇好多時都要靠班演員自己執生，認真嘅美儀試過俾意見，但可能佢講嘢冇尾音，跟住有人同珍姐打小報告話佢多事，之後就坐冷板。」知情者說。
解凍拍 Do姐
入雪櫃多月，陳敏之與江美儀終於在余詠珊出手下，成功解凍。
「珍姐雖然係戲劇組皇太后，不過佢開始被削權， Sandy（余詠珊）同珍姐擺明對着幹，咪專登安排陳敏之拍《 Do姐去 shopping》，唔想有演技嘅江美儀冇工開，嚟緊再開個新節目俾佢做，總之唔使長擺喺雪櫃。」
擴張勢力
掌管綜藝節目的余詠珊，為進一步擴張勢力範圍，近年招兵買馬搵自己友寫劇本準備開劇，早前更與騰訊傾掂合作拍網劇，頭炮《使徒行者 2》，將是大台一六年的重點製作。
「佘詩曼林峯套《使徒行者》喺大陸網上點擊率累積已超過廿億，破晒港劇紀錄。無綫同騰訊視頻簽咗合作協議，會開《使徒行者 2》網劇，阿佘同美儀都有份拍，仲有三哥（苗僑偉）都傾掂數。至於珍姐眼中釘王祖藍，雖然過咗邵氏嗰邊，但珍姐而家冇得惡晒，傾祖藍幫無綫開劇，機會亦大咗。」一名無綫人說。
撰文、攝影、攝錄：娛樂組
|
鍾意就快D Share啦！
|
|
|