Round 1
同你吟一吟
明星煙民 一街都係
世衞話吸煙比食煙燻醃製食物，有更高機會患癌，但大部分人本住食乜都死心態，飯唔食冇問題，煙一定照食。
娛樂圈，一街煙民。有啲人會好小心，盡量唔喺公眾地方食，免得俾人見到，影低扯煙相；不過唔怕俾人知係煙精嘅仲多，尤其食肆全面禁煙後，同朋友食飯飲茶吹水，半途出去「呼吸」，更加避無可避。
好似許志安、余文樂、馮德倫、 Amanda S.同 Jeana何佩瑜，癮起，話之你。
許志安 又煙又酒
Happy hour，天后老公許志安選擇去淺水灣，同人飲住白酒吹水，其間兩度離開餐廳「呼吸」，兩個鐘扯兩飛，都唔算大癮。
又煙又酒嘅許安，同朋友前後飲咗兩 round，四點幾飲到六點幾，夠鐘揸車返歸交人。
Amanda S. 壯男陪食二手煙
約朋友喺跑馬地南亭食串燒， Amanda S.煙癮起，自己一個走出門外上電，食食吓，其中一個戴帽外籍壯男走埋出嚟，不過唔係一齊扯，純粹吸住二手煙陪傾偈。
35歲 Amanda S.舊年七月離咗婚，有景好正常。
余文樂 中環面壁
明知中環多傳媒行咇，癮起想食煙點算？余文樂選擇行去人比較少嘅雪廠街，搵個大廈走火門凹位，面壁扯！食完再行返去皇后大道中，置地文華外面等朋友車接。
Jeana 食完正餐再開飯
同張栢芝細佬栢文散咗後， 34D不倒胸 Jeana（何佩瑜）積極搵錢收復失地，有晚《壹》仔見佢約咗電影監製伍健雄喺鯉景灣一間餐廳食住飯傾嘢，食咗接近兩粒鐘，臨走前， Jeana終於忍唔住丟低「老細」，行開陣去「開飯」。
馮德倫 坐門口方便食煙
女友舒淇入夜後水都唔飲啖，食菜亦唔肯食葉（因為菜葉水分較多），夜晚陪女友開餐，馮德倫肯定唔開胃。冇問題，搵其他 friend補番數。
早排馮德倫搵朋友去跑馬地陪食，兩男先喺門口有枱，方便食煙嘅 The Tuck Room飲杯嘢，食吓小食扯吓煙， hea咗個半鐘，再睇吓今晚食乜嘢？最後決定食越南菜。
撰文：八珍
|
鍾意就快D Share啦！
|
|
|