蕊蕊嚇破膽甘為金剛擋子彈
藝人金剛昨日在台北經歷槍擊事件，令一眾好友紛紛嚇破膽。女友蕊蕊雖然坦言男友已隔空報平安，但仍驚魂未定，更自言願捨身為男友擋子彈：「保護自己最重要嘅人！」至於與金剛合作無間的小儀，就拍心口指對方絕非醉酒鬧事之徒，力撐對方行為檢點，投下信任一票：「醉酒搞事一定唔關佢事！」
來自台灣的34歲藝人金剛，昨日凌晨經歷驚險時刻，在台北酒店夜場捲入槍擊事件。身為金剛女友的蕊蕊事發時身在香港，坦言男友雖已隔空報平安，但始終非常擔心對方安危，更願以身犯險用肉身為男友擋子彈：「當時如果我喺度一定會好驚，都可能會不知所措，但情急之下都會想保護自己最重要嘅人！」
談到事發經過，她透露金剛原到當地與香港朋友洽談開舖事宜：「一出電梯，現場就好混亂，然後金剛被人推入廁所，直到警察到場，就叫佢返警局協助調查，嗰個人（槍擊手）佢完全唔識。」直言對男友投信任一票的蕊蕊，指因公事未能到台灣探望：「佢話自己冇事，仲安慰番我叫我唔使擔心。（叫金剛減少出入夜店？）佢嘅事我管唔到咁多呀！大家可以自己問佢。（更珍惜眼前人？）我一直都好珍惜眼前人，件事唔會有咩特別大嘅影響。（快啲結婚？）一件事還一件事，依家當務之急係金剛嘅安全先，結婚就遲吓先再打算。」
聲線清晰
至於一向與金剛合作無間的藝人小儀，昨日在完成電台節目工作後受訪時稱，自己昨晨收到朋友轉發的台灣新聞，再聽到電台提及事件才心知不妙。因為事件中有人連開五槍，情況嚴重，所以早上九時許就聯絡金剛，對方亦短時間內回覆，小儀謂：「佢聲線清晰，更強調自己同事件無關，當時佢正喺廁所，唔清楚情況，叫我唔使擔心，而佢都喺Facebook報咗平安！」
多人集郵
談到事件中疑有人因碰撞最後搞到大打出手，曾與金剛到台灣拍攝無綫節目《街坊廚神舌戰新台韓》的小儀，認為金剛在台灣知名度高，行為相當檢點，更拍心口謂：「嗰次喺台南，佢帶我去夜市，好多人認出佢仲要求影相，我仲做咗佢助手幫佢擋住啲人！（酒量？）其實佢酒量好淺，之前我哋去台灣見佢成日車朋友，所以佢都唔飲酒，醉酒搞事一定唔關佢事！」
文：影視組
|
鍾意就快D Share啦！
|
|
|