掃呢頁CODE去手機

2015年12月23日 星期三

洗米嫂離婚分身家  Mandy Lieu快閃 2日示威坐正 [FACE - 448] __,Mandy,劉碧麗,陳慧玲,洗米嫂,周焯華,洗米華,Mandy Lieu,MF,

世紀拖手當晚,素顏MandyLieu表現得楚楚可憐,唔怪得周焯華都忍唔住拖實佢返屋企。封面洗米嫂離婚分身家 MandyLieu快閃2日示威坐正太陽娛樂老闆洗米華(周焯華)同小三MandyLieu連女都生埋,但礙於正印Heidi(陳慧玲)多年來跟隨自己打江山,又為周家生了兩個女,始終家庭行先唔敢承認Mandy身份。不過上週終有突破性發展,Mandy忽然由英國返港,與洗米華在1億半山愛巢樓下上演世紀拖 ...


世紀拖手當晚,素顏 Mandy Lieu表現得楚楚可憐,唔怪得周焯華都忍唔住拖實佢返屋企。

封面

洗米嫂離婚分身家  Mandy Lieu快閃 2日示威坐正

太陽娛樂老闆洗米華(周焯華)同小三 Mandy Lieu連女都生埋,但礙於正印 Heidi(陳慧玲)多年來跟隨自己打江山,又為周家生了兩個女,始終家庭行先唔敢承認 Mandy身份。

不過上週終有突破性發展, Mandy忽然由英國返港,與洗米華在 1億半山愛巢樓下上演世紀拖手,同時又傳出 Mandy已懷有第二胎「華種」,小三出招手法層出不窮!快閃式回港 2日, Mandy擺明挑機示威。老公變心,洗米嫂亦決定攤牌離婚。有指洗米華擁有逾 14億身家,既然留唔住個心,留住佢啲金都好

去年 8月自爆與周焯華撻着的 Mandy Lieu,明知對方有家室依然積極進取,肯做人肉坐墊,又密密陪飛做跟得女友。相識 1年多已為男方生女, Mandy更氹到洗米華送豪宅,手段比國內女人更加快狠準!

Mandy Lieu落機後直奔九龍城打邊爐,洗米華則隨後行後門上樓會合。

正印 Heidi堅決要離婚,更憤然退出日本 family trip,得番洗米華同大仔周柏豪,女兒周梓童出發。

早前 Mandy被影到帶住初生囡囡喺倫敦市中心食中國菜。《蘋果日報》圖片

拖手辣㷫正印

火速上位做寵妃,奈何 Mandy仍未心足,不斷向正印之位步步進迫。上週四( 17日), Mandy獨自由英國回港,一落機即直奔九龍城一間火鍋店,原來係約了洗米華打邊爐。

本來食飯好普通,點知兩人一齊返回洗米華送俾 Mandy的 1億豪宅珒然,落車時竟然當住眾多傳媒面前甜蜜拖手!雖然兩人過往多次外遊都試過斷正,但如此光明正大公開拖手,一秒辣㷫原本隻眼開隻眼閉的洗米嫂。

週一( 21日),柏豪喺 fb上載一家三口合照。洗米華笑容滿面心情唔錯,唔通離婚一事有得掹?(網上圖片)

柏豪上週在 ig訴苦,話自己創業搞 app,不獲屋企人支持,被鬧浪費時間。

Heidi冇同行,柏豪肩負起大哥責任,照顧同父異母細妹。不過唔知係咪受父母離婚消息影響,柏豪喺日本都忍唔住話自己好唔舒服。(網上圖片)

甩底日本 family trip

今次 Mandy忽然返港示威,據知有傳已懷有第二胎「華種」,大把籌碼迫 Heidi讓出正印之位。而 Heidi亦對老公死心,於世紀拖手翌日宣佈單方面搞離婚,「搞緊離婚,不過有好多嘢交畀律師處理緊,暫時唔方便講太多。佢哋嘅事已經唔再關我事,我冇嘢回應。」

成功「激」退大婆的 Mandy,奸計得逞後已於週六( 19日)離港,繼續過小三的秘密生活,有指洗米華會陪 Mandy於外地共渡甜蜜聖誕;而慘被老公落面的 Heidi,選擇甩底唔去日本 family trip,寧願留在澳門湊細女周羨童。

洗米華一向重視家庭生活,今次會唔會因為 Mandy而一手拆散自己頭家?(網上圖片)

馮雪冰 13年 4月以 1,778萬買入天璽單位。《蘋果日報》圖片

亞姐舊愛買千七萬豪宅

即使今次搶到正印位, Mandy Lieu都咪開心住!其實洗米華出名風流,分別與陳雅倫、 Mango王秀琳、「藍莓」劉俐等傳過緋聞,今年 11月又疑似搭上「翻版謝安琪」 Meko Chiu,女人緣極旺。

女仔爭住送上門,全因洗米華有錢有面有樣外,出手亦相當闊綽。有傳 11年亞姐冠軍馮雪冰曾受洗米華照顧,分手後有樓收,本刊發現馮雪冰 13年忽然富貴,以 1,770萬買入西九龍豪宅天璽自住。對女伴豪爽,不過有傳洗米華明年 3月前要清還一條高達 3億的款項,加上旗下賭場生意大不如前,如果 Heidi真係要離婚分一半身家,睇怕佢都幾頭痕!

亞姐舊愛開 PO:等候上岸

現年 27歲的馮雪冰,擁有 33吋上圍, 5呎 7吋半身高, fit到漏!《蘋果日報》圖片

唔使點做,馮雪冰不時在微博晒家居照。(網上圖片)

馮雪冰 13年 1月在微博指自己「等候上岸」,同年 4月即買過千萬「天璽」單位,成功上岸!(網上圖片)

最後同場

兩公婆對上一次出席公開活動,已經係 12月 4日的太陽國際拍賣會。(網上圖片)

網上圖片

蕭定一女兒上月尾擺百日宴, Heidi同洗米華前後腳到場,冇影合照。(網上圖片)

Mandy 1月回歸

《蘋果日報》圖片

今次 Mandy Lieu回港快閃 2日示威,唔使幾耐又會再度返香港,更將以老闆娘身份出活動! Mandy已由普通 model榮升 model公司老闆,據知唔想做黃面婆的她已積極部署新工作。頭炮係下月孖住旗下新女鄭妍之,出席壹美健醫療美容宣傳活動。不過盛傳 Mandy懷有第二胎,到時專心安胎定復出都未知喎!

離唔離婚好?

向太

如果是我,就不會這麼容易放棄及拱手把老公讓給別人!希望男的珍惜眼前人,不要讓友人們失望啊!《蘋果日報》圖片

梁安琪

唔係好信,夫妻咁多年,又有細路,希望佢哋慢慢傾。《蘋果日報》圖片

可嵐

有小三會影響心情、家庭同小朋友,分開住照顧小朋友之後大家開心咗好多!《蘋果日報》圖片

女星愛洗米

41歲周焯華貴為澳門多個賭廳揸 fit人,亦係 3間上市公司 CEO,身家估計超過 14億!加上平時熱愛健身,身形 keep得好,難怪有老婆都咁多女埋身!

王秀琳

有傳洗米華 12年曾照顧 Mango,仲打本俾女友在中環開日本餐廳,又介紹朋友幫襯。《蘋果日報》圖片

Meko Chiu

今年 11月,「翻版謝安琪」 Meko Chiu上載一張與洗米華坐私人飛機的照片,更寫明「 wif my luv洗米華」。不過 Meko自知激嬲華哥,剷走 fb同 ig帳號補鑊。(網上圖片)

陳雅倫

有傳 09年同陳雅倫拍過拖,洗米華為爭女更與前威尼斯人賭場總裁 Mark Brown大打出手,事後陳雅倫否認,表示二人只係朋友。《蘋果日報》圖片

「藍莓」劉俐

13年被影到與洗米華於澳門密會,事後藍莓堅稱大家只係傾合作,不過就冇解釋係邊方面合作喎!《忽然 1周》圖片

採訪、撰文:娛樂組

攝影:娛樂突發組


鍾意就快D Share啦!