胡杏兒同 Philip拍拖年幾就決定結婚，足證杏兒今次愛得幾投入！ 《蘋果日報》圖片
封面
婚前大洗底 胡杏兒逼未婚夫撤出夜場
胡杏兒將於今個月 28日同未婚夫 Philip（李乘德）結婚，雖然最後要嫁雞隨雞去沙頭角行禮，不過杏兒愛得痴纏，冇童話式婚禮照樣嫁得開心。
搵埋唔少的杏兒，講明唔介意老公身家多少，豪言「佢冇錢唔緊要，我有！」有冇樓有冇車係其次，其實杏兒最介意老公的生活圈子。身為中環著名夜場 PLAY細股東的 Philip，經常被影到落 club同女仔吹水，要杏兒幫手解畫。為免 Philip以應酬做藉口留連夜店，杏兒最近終於出手要老公全面撤出夜場，放棄手上持有的 1/20股份，專注獵頭公司事業。
有杏兒做大靠山，做唔做夜場老闆又有乜所謂！
42歲 Philip早前求婚成功，雖然收入唔及杏兒，依然傾盡身家在五星級酒店 Ritz Carlton擺 50圍，豪娶擁有半億身家的小富婆過門。
拍檔另組班底
做得明星的另一半，最緊要唔好影響老婆。 Philip溝女戰績唔少，曾經追過李施嬅、張曦雯，被封「港姐殺手」；加上 Philip是著名夜場 PLAY股東，多次被影到落 club夜蒲，甚至與女性朋友摸手臂咬耳仔。
未結婚已斷正，杏兒把口死撐話百份百信任，其實好介意 Philip經常留連夜場。一向甚少提男友私隱的杏兒，甚至主動澄清 Philip職業，「大家成日話佢係夜場老闆，其實佢有間獵頭公司都做得好好，我覺得都夠，唔好成日鬥幾多身家。」
PLAY剛於 12月 4日重新開張，大股東巫翊鳴（原名巫雨平、清洪契仔）在 opening party向友人透露已結束 Philip有 1/20股份的公司，另組公司再以 PLAY名義搞夜場，換言之 Philip與 PLAY現已再冇任何關係！
據知杏兒一直希望老公撤出夜店生意，每次有 Philip夜蒲的新聞見報，都會向朋友呻，「杏兒不嬲唔想 Philip繼續搞 PLAY，撞啱 Xuan（巫翊鳴）想自立門戶，杏兒梗係加多兩錢肉緊叫 Philip退出況且呢項生意只係當投資，係 side business，既然杏兒開到聲， Philip咪順下老婆意思唔玩囉！」
PLAY重開 Philip唔到
本刊發現 PLAY的確於今年 9月以「御澤有限公司」重新註冊，而新公司已剔除 Philip名字，上週五的 opening party， Philip亦冇到，絕跡夜場。不過巫翊鳴向本刊否認 Philip退出唔玩，「 PLAY剛剛重新裝修咗， Philip照樣有股份，同以前差唔多㗎！佢成日同朋友落嚟玩，不過 opening當日我太忙，唔記得佢有冇嚟喇！」而 Philip則唔肯回應，以不在香港為理由迅速 cut線。
冇咗盤生意事小，冇藉口落去夜蒲事大！不過杏兒出名鍾意管住另一半，仲有三星期就做老襯的 Philip，係時候適應下
把口最叻
不嬲有個朵係「港姐殺手」，又可以喺短短一年內追到杏兒仲娶埋過門， Philip年青有為就梗㗎喇，最緊要都係把口識氹人，仲要專揀杏兒 fb公開氹，唔只冧到杏兒，連杏兒家姐都投晒降！
採訪、撰文、攝影：娛樂組
|
鍾意就快D Share啦！
|
|
|
