全知言
怏啲取消 TSA 黃秋生：搞到小朋友癲咁滯！
TSA評核試搞到班小朋友日操夜操，全港正常嘅家長鬧爆，為咗下一代着想，廢除呢個試係度不容媛架！其實唔操 TSA，小朋友都仲有好多嘢可以學架！一班藝人都話幫助小學生嘅興趣發展先係最重要！
黃秋生：大把其他嘢
唔操 TSA，家長決定鍾意操咩就操咩！根據小朋友天份，鍾意做乜就做乜！大把嘢可以學，學煮餸都幾好㗎！返到屋企，父母是但一個煮餸叻，可以跟下佢哋切蔥、搣蒜、挑蝦腸，煲水咩叫「蟹眼」，咩叫「魚眼」，幾多嘢學，幾多嘢好做，幾多嘢唔好做，做咩 TSA！搞到小朋友癲咁滯！
蘇玉華：學習自救
我都係支持取消 TSA嘅人！因為學習不只限於書本上，更加唔認同不斷要啲學生去操啲試題！唔考 TSA，有太多嘢可以做！一個小朋友應該俾個快樂童年佢！譬如接觸大自然，帶佢哋遊山玩水，已經係最好嘅教育！好多時𠵱家小朋友冇一種自處、自救能力，關邊個事？咪關大人事囉！因為冇製造一個環境俾佢哋學習！而呢樣嘢係佢哋最值得去學習！關乎人點樣生存喺呢個世界，點樣自處、求生，從來冇一個課程去教佢哋！所以喺佢哋好忙嘅學校生活以外，更加應該帶佢哋接觸大自然，關乎人嘅嘢！
朱慧敏：玩最緊要
我噚日睇到一篇文章，講到 BB到少年時期，「玩」係好緊要一環！你冇咗「玩」，人生缺少咗一部分。好似馬嬲做例子，有得「玩」嘅馬嬲大個咗係靈活啲，就算喺森林求生技能都強好多。我覺得香港讀書好辛苦，香港係填鴨式背嘢會好叻，而我就覺得「玩」好緊要！唔考試考「玩」，即係考游水、打羽毛球、樂器，小學生咪帶佢哋去啲野外活動，考佢哋點樣求生、生火、起帳幕，都係一個考試。
馬詩慧：自由發揮
基本上小學生、中學生由年頭到年尾都係不停測驗考試，佢哋返學就係讀書、做功課、讀書、做功課……有冇呢個試係咪真係咁重要，冇咗呢個試係咪釐定唔到學生程度，我諗父母都心知肚明囉！唔做 TSA，小朋友可以做佢哋自己想做嘅嘢，運動又好，音樂又好，唱歌又好，咩課外活動都好，總言之係佢自己鍾意嘅，唔係被逼去做嘅嘢，咁對小朋友心智發展好緊要！
姚嘉妮：活學活用
我覺得小朋友應該俾番啲開心嘅童年回憶佢哋，喺無壓力底下成長，所以唔好逼小朋友去讀書，當佢哋唔驚返學就會吸收知識，但驚就會抗拒就有壓力，壓力係一個負面影響。就算灌輸幾多嘢俾佢哋，一有壓力點會成長得開心，對佢哋係有好大陰影！我覺得多啲同佢哋玩，多啲去 field trip，喺活學活用嘅時候，親眼見到啲嘢去接觸，嚟學習新嘅知識就最好！
考嚟冇意義 街坊： TSA題目冇乜用！
街坊們一樣支持取消 TSA試，仲話會搞到學生壓力爆煲添！
【東】
其實做乜都好，最緊要佢哋開心，我估計學生操 TSA唔會開心得去邊！我估上次立法會個𡃁仔好明顯係佢老竇俾稿佢讀㗎正路點會鍾意操 TSA！佢鍾意打波就打波，鍾意睇書就睇書，或者鍾意打機都冇所謂，人唔係由出世就訓練到個機器咁！平衡自己生活最緊要！
即時報料 facepop
熱線： 9222 0828
電郵：mailto:mailto:facenews@nextmedia.com
facebook： Face Magazine inbox
line、 we chat id： facemagazine
|
鍾意就快D Share啦！
|
|
|
