馬國明拒加監被雪，由他擔正的《流氓皇帝》亦變成倉底貨。
探熱針
雪馬明要陪葬 周麗淇嬲爆
跟無綫簽部頭約的周麗淇， 14年與馬國明合作重演 34年前經典《流氓皇帝》，劇集原本安排去年八月上，連記者會宣傳片都拍埋，不過事隔一日，劇集突然作出調動，劇集抽起至今，播映無期。重頭劇變倉底貨，無綫未有交代因由，還不斷要求 Niki再拍劇，令 Niki及其經理人大岳娛樂，𢱑爆頭！
石沉大海
無綫搵潘嘉德重拍經典電視劇《流氓皇帝》，孭飛的周麗淇和馬國明後生做到老，拍足三個月，劇集原本安排去年八月播出，早在去年的七月八日，兩人已一起做過傳媒訪問，亦拍埋宣傳片，但一日後，劇集突然被抽起。
出爾反爾，無綫更將《流》劇放入倉底，只因男主角馬國明不肯與公司加簽經理人合約。
「嗰陣馬明同公司仲有兩年幾約，但啲花旦小生係咁走，所以公司要啲藝人加監，仲一嚟就要馬明加簽八年，馬明唔制！咪即刻入雪櫃，搵佢祭旗逼佢就範，同時嚇吓其他人，警告大家唔好嘗試同公司對抗。」一名無綫人說。
馬明被雪，他孭飛的《流氓皇帝》慘變炮灰，身為外援的周麗淇全不知情。
「見晒記者先突然被抽起， Niki都唔知發生乜事，原先話由八月調去台慶前播，最後又唔係，無綫亦冇交代原因，大岳嗰邊都有追問究竟幾時播，但每次無綫都冇答案。」
氹做親生女
但另一方面，無綫還不斷要求仍欠一個劇的 Niki再俾期接新劇。
「新人孭飛嘅劇收視根本唔掂，無綫要搵外援救亡，好似羅嘉良、陳松伶、宣萱都會返嚟幫手，添哥（李添勝）都搵咗 Niki好多次，傾佢返嚟拍《呂后傳》，但嗰陣 Niki為咗《流氓皇帝》，已經推咗一部內地劇，見無綫唔交代清楚，所以大岳唔肯再放期，不過無綫就係咁𦧲，到而家都冇放棄。」
兩年前，無綫已不斷游說當時快約滿大岳娛樂的 Niki，簽約做親生女，不過 Niki最終續約舊公司，更拍了兩部內地劇《臥底》及《家年華》，收入過千萬，唔吼出手低，又立立亂的無綫。
一黨獨大
無綫變天，高層大地震，一線小生花旦係咁走，去年初戲劇製作總監梁家樹退休後，去年十月，李寶安愛將杜之克升任為助理總經理，取代無綫節目發展分部總監彭濟材，統領戲劇及非戲劇創作，余詠珊勢力再坐大，開宗明義剷除異己，有得留低的監製，全屬余詠珊黨，愛將黃翠如、洪永城、李思捷劇接劇，自己友玩晒！
撰文、攝影、攝錄：娛樂組
|
鍾意就快D Share啦！
|
|
|
