深田恭子推出寫真集《 Nu Season》，以成熟美為主題， Deep V高衩大晒微胖身材，有肉地點都好睇過得棚骨。
外太空
Kyoko Fukada深田恭子 中女育成記
網上媒體大行其道，出版業面臨危機，講緊嘅唔只係香港，日本如是，就連最好賣嘅寫真集，近年都銷量急跌。
不過喺呢個出版淡季，依然有人可以一年出一至兩本寫真集，而且係銷量保證！佢並唔係什麼新進𡃁模，而係三十三歲、一代女神深田恭子！
踏入三十歲之後恭子愈戰愈勇，近三年出咗四本寫真集， 2016年第一擊推出《 Nu Season》，大 sell成熟美。由《上帝！請給我多一點時間》睇住 16歲嘅佢長大，話咁快變成中女，歲月不饒人，惟有繼續搵錢！
意大利取景
深田恭子又出寫真集，近三年出咗四本，係咪真係咁多嘢影？ 2014年《(un)touch》猶如內衣指南，上年《 Down to earth》賣大包三點式海灘衝浪，年尾食得唔好嘥，再整多本《 Down To Earth Another》，本本都係銷量冠軍！咁今年呢本 sell乜呢？《 Nu Season》嘅主題係成熟美，恭子特別去到意大利威尼斯同羅馬取景，配合各款高貴晚裝，展現恭子中女嘅成熟魅力。恭子特別去到尊尼特普（ Johnny Depp）同安祖蓮娜祖莉（ Angelina Jolie）主演嘅名作、《機密邂逅》（ The Tourist）入面嗰間總統套房取景，喺梳化上大擺誘人甫士，向荷李活天后挑機！雖然今次寫真嘅相唔算少布，不過著長裙都可以低胸高衩，呢種就係恭子想 sell嘅成熟性感，擺脫少女形象，反應唔錯，寫真集又攞冠軍，下年再出真係要諗吓其他主題喇！
演剩女 人氣反彈
踏入三字頭，恭子更加進取，之前兩年想行硬淨路線，試過女警查案及女教師姊弟戀等戲種，積極轉型，不過始終唔係好啱佢。今季日劇終於俾佢遇到好劇本，喺《請和廢柴的我談戀愛》入面，飾演三十歲都唔識拍拖嘅剩女，劇迷大讚恭子完全唔似 33歲，加上女主角嘅性格不諳世事，恭子扮無辜被騙嘅演技可以話係駕輕就熟，非常討好。男主角係之前喺台灣發展、最近回流返日本而人氣急升嘅藤岡靛，兩個飾演鬥氣寃家成日鬧交，充滿喜感。近年有好多改編少女漫畫嘅電視劇，呢套算係最好口碑，甚至直逼當年綾瀨遙嘅《螢之光》，且看《請和廢柴的我談戀愛》可否維持強勢，為恭子事業創下另一高峰。
撰文：關錦雯
|
鍾意就快D Share啦！
|
|
|
