娛樂偵訊
入紙紅館開個唱 死谷鄭俊弘上一線
在《星夢傳奇》成為雙料冠軍的鄭俊弘（ Fred），彈出做歌手不足兩年，已在九展舉行過兩次個人演唱會，身為星夢娛樂一哥，獲公司催谷做一線男歌手，入紙紅館今年開個唱！死谷爛谷，只為在來年的無綫勁歌金曲頒獎禮，名正言順做最受歡迎男歌手。
唔想認矮仔
有在無綫揸大旗的余詠珊（ Sandy），和在官方唱片公司「星夢娛樂」做行政總裁的「王夫」何哲圖（ Herman）雙劍合璧，鄭俊弘被栽培成一線男歌手，去年底獲公司安排，入紙申請紅館開演唱會。「雖然已經係星夢嘅一哥，不過 Fred未開過紅館騷，感覺始終會差啲， Herman舊年底入紙申請幫佢攞紅館檔期，聽講都批咗。」知情者說。
無綫眾叛親離，也是鄭俊弘破格推做一線歌手的原因。
「呢兩年《勁歌金曲》總選見得人嘅歌手買少見少， Sandy又唔想認低威，每次頒獎禮前同出面啲唱片公司講數，所以佢最想自己人玩晒！不過就算『星夢』班歌手可以洗腦唱電視劇主題曲，但始終未成氣候， Sandy同 Herman覺得最佳解決方法，係做個自己品牌歌手，所以谷 Fred開紅館騷，推佢上一線。」
拍住羅嘉良
余詠珊更打算歌、視兩邊齊推，去年十一月開拍的新劇《 TV Buddy》，由鄭俊弘擔正，但撞正戲劇製作部大地震，有高層認為劇本和演員卡士都太弱下令叫停。
「其實都唔係壞事，總好過第一次孭飛又唔收得好，更何況 Sandy已經安排咗另一套劇俾 Fred，下個月同羅嘉良合作《與諜同謀》，做個保安公司間諜，角色夠複雜又有發揮，仲有回巢幫手嘅撈家（羅嘉良）頂住，應該可以幫到 Fred。」知情者說。
頂爛市
紅館開個唱是歌手的最終夢想，八、九十年代天王天后的紅館舞台，自從唱片市道不景氣後，年資只得一、兩年的新一輩，亦有機會獲批出檔期，名副其實頂爛市。
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|
