熱爆娛樂: 激嬲鄭丹瑞冇得撈　張致恒靠有米女友撐 [壹週刊

2016年2月11日星期四

激嬲鄭丹瑞冇得撈　張致恒靠有米女友撐 [壹週刊 - 1353] __,張致恒,M1,

娛樂偵訊

激嬲鄭丹瑞冇得撈　張致恒靠有米女友撐

出道 12年，由組合 Boyz變單飛發展的張致恒（ Steven），多年來毫無起色，前年經理人公司英皇安排他入無綫拍劇做主持，跟鄭丹瑞拍檔做健康資訊節目，點知又唔生性遲大到，激嬲鄭丹瑞要求換人。冇有怕！因為有米女友莊端兒撐住， Steven推出自家品牌，賣衫做老闆。

遲到幾粒鐘

○五年跟拍檔關智斌拆夥分開發展，再另組 Sun Boyz的張致恒轉眼已經三十一歲，一直撈極唔起；試過在工廠大廈開 workshop幫人影相，分租場地給人開班教畫畫彈結他賺外快，直至前年被英皇安排入無綫拍劇，工作量才稍為提升。

「其實 Steven（張致恒）做戲有天分，外形又夠高大，拍過兩部劇之後， TVB都仲有搵佢拍《巨輪 2》，當時又拍劇又做《你食得健康嗎？》主持，不過稍為多嘢做少少，佢又發作開始遲到，成日唔知醒，遲到幾粒鐘。佢喺英皇都係咁，試過顧住拍拖，做嘢懶懶散散俾公司雪藏。旦哥（鄭丹瑞）已經好好脾氣，但都忍唔住，開第三輯嗰陣要求換人，而家張景淳頂咗佢個位。」知情者說。

上週一，張致恒跟女友在旺角開檔賣衫，有客到，他即落足嘴頭狂 sell。

跟 Xenia拍拖後，他經常放嘴嘴相放閃。

今年初， Twins合體，他跟關智斌亦有機會孖住上紅館唱歌做嘉賓，但身形肥未操弗。

張致恒去年揸女友車跟人有碰撞，事後對方在 ig狂寸他要小心駕駛兼惡人先告狀。

三年後結婚

自作自受！張致恒冇有怕！自恃有個有米女友撐腰，唔做嘢冇收入，都可以繼續吃喝玩樂。

「 Xenia（莊端兒）屋企有錢，同 Steven拍拖之後，兩個成日孖住出埠，又俾自己架車 Steven揸， Steven呢一年搞 pop up store賣自家品牌， Xenia都出錢出力，成日陪男友睇鋪 sell客。不過 Steven今次唔係玩玩吓，對 Xenia好細心，之前女友生日，仲特登整咗個蛋糕氹佢開心。」

上週一（二月一日）黃昏，張致恒在旺角一個商場內擺檔七日賣自家品牌 Zeal，女友亦在場陪睇檔，其間有客睇衫， Steven落足嘴頭招呼，更剝埋身上外套力 sell。

「 Steven諗過三年後結婚，都知要俾心機搵錢，佢同英皇差唔多約滿，不過到而家公司都冇聲氣叫續約，佢都知自己再係咁落去，會俾公司自然流失，所以都要搵定後路。」知情者說。