每次上車，袁偉豪都會幫女友岑杏賢戴頭盔，拉起領口提佢保暖。
探熱針
施馬 Sir袁偉豪做暖男
在無綫等了八年的 07年港男冠軍袁偉豪，最近憑《鐵馬戰車》的生鬼「施馬 Sir」轉運！事業有起色，和拍拖兩年的「碩士女友」岑杏賢感情亦穩定，袁偉豪為對方學做煮飯公，日前又揸住戰車，載女友去食糖水，體貼做暖男。
十度去兜風
多女埋身的袁偉豪，自從與「碩士港姐」岑杏賢拍拖後修心養性，甚至甘願被對方改造成住家男。早前為《鐵馬》做宣傳時，被問到與出名「發電機」的蔡思貝開工是否有過電，袁偉豪立即公開向女友派定心丸：「我都係發電機，不過只係 hold住電力留俾女友。」
女友有樣好身材又高學歷，袁偉豪自然要出盡法寶拑實。
戲裡戲外都鍾意揸鐵馬的袁偉豪，上週三（二月三日）晚十點，出動新戰車載女友離開將軍澳寓所，出外兜風。夜晚氣溫只得十度，兩人一身禦寒戰衣，加上女友岑杏賢攬到實做人肉暖包，坐前座食正風的施馬 sir一樣暖笠笠。
不過，有女友做座上客，袁偉豪未敢風馳電掣，全程六十公里安全駕駛。
去到西貢食糖水，袁偉豪幫女友攞頭盔、除手套，又檢視外套有否未拉好入風，見女友塊面有污糟，又動手清理，體貼到呢！兩人坐低只點了一份甜品，主力岑杏賢食，好明顯，施馬 sir是專登出車，載女友去食甜品消夜。
細心贏富二代
男友條件唔夠自己好，但細心攞滿分，岑杏賢更加同閨密晒幸福，話自己搵啱對象。
「阿 Ben（袁偉豪）雖然有啲大男人，但對女友真係照顧得好好。佢哋搬入將軍澳同居，成屋傢俬電器， Jennifer（岑杏賢）話阿 Ben問完佢意見就自己一手搞掂晒， Jennifer乜都唔使理；阿 Ben知道女友鍾意食甜品，又專登買書研究自學，只要唔使開工，就買餸煮飯，仲整埋甜品， Jennifer做女王咁等食。其實 Jennifer有好多人追，仲有啲係富二代，但阿 Ben賣細心已經夠贏。」岑杏賢身邊人說。
港台暖男
韓風颳起，細心溫柔靚仔是韓劇男主角的標籤，「暖男」更成為時下潮語，除了韓國，港、台兩地亦不乏暖男代表。
謝霆鋒
自拍了《十二道鋒味》，被網友封為「暖男帥鍋」。今年一月，霆鋒飛韓國與吳奇隆合作韓版《步步驚心》被媒體追訪，當時霆鋒見有個女記者差點被車撞到，即一手將她拉回安全位置，一幕英雄救美被當地傳媒大做文章，封他為暖男。
撰文、攝影、攝錄：娛樂組
|
鍾意就快D Share啦！
|
|
|
