陳浩民5年抱4 誕香港的女兒
已育有兩女一子的46歲藝人陳浩民，其太太蔣麗莎昨日在香港為他誕下第四胎，5年抱4！B女取名為Victoria，原來這名字別具意義，解釋為「香港的女兒」。身為多仔公的陳浩民直言造人計劃要暫停，並笑說：「想畀太太『放監』！」
已育有兩女一子的陳浩民夫婦，現在再添一名千金。
其實「三年抱兩」已經夠勁，藝人陳浩民「五年抱四」仲勁！46歲的陳浩民自2011年與太太蔣麗莎拉埋天窗後火速「造人」，短短四年間已育有兩女一子，去年他更宣布太太佗第四胎。直到昨日蔣麗莎終於在老公的陪同下，在銅鑼灣聖保祿醫院開刀誕下女兒，取名Victoria，重約3.4千克（約7.5磅）！
唔敢引太太笑
陳浩民接受本報電話訪問時，他難掩喜悅，指Victoria長得似三家姐陳若嫣之餘，並娓娓道來見證太太生第四胎時的經歷：「今次係第一次由開刀到縫針所有過程都陪住老婆，因為想我幫佢清楚了解整個過程。太太係半身麻醉，過程清醒，我原本想講笑令佢分心，點知畀醫生勸，因為話佢笑到個肚郁落唔到刀！太太生四個BB都係開刀，開同一個位置。」
談到女兒取名為Victoria，浩民解釋意為「香港的女兒」：「佢代表咗香港，同埋我哋新居會係面對維港。」此外他又透露大女陳雅薷幫妹妹改了一個小名，叫做「LuLu」。
新居當獎品
太太懷胎十月，含辛茹苦誕下四個「小天使」，陳浩民透露有準備驚喜禮物送給太太：「原本準備咗禮物，但畀Sales打嚟拆穿咗，太太接咗電話，知道係名貴手袋，佢話唔鍾意唔想要，最後冇送。好感謝太太咁為我設想，新居當送畀老婆！（送咩畀B女？）幫佢準備咗教育基金！」
至於陳浩民身為圈中多仔公，問他會否繼續生？他笑說：「順其自然，醫生都講笑叫我唔好再嚟搵佢！自己覺得小朋友好得意，但依家想畀太太『放監』，困住咗佢五年，日日都孭住個波，畀佢抖吓先，短期唔會生住。」
儘管陳浩民今次已是第四度當爸爸，但他仍不敢怠慢。原本他正忙於在內地拍攝電影《隱之愛人》，無法回來陪產，但他特別向劇組請假，在前日（29號）收工趕回香港陪蔣麗莎待產。然而當時蔣麗莎久久未能入睡，凌晨時分在微博上載被老公陳浩民懷抱相擁的照片，畫面甜蜜，相中更寫道「Baby Victoria」。昨晚蔣麗莎生B後，在微博上載子女摸着B女的照片，並留言：「恐龍蛋，今日成功破殼，Victoria歡迎你來到我們六口之家！」
而昨早在太太開刀前，陳浩民也在微博上載一張身穿藍色保護袍、戴口罩的照片，準備進入產房，他留言：「祝我們好運，希望一切順利！」
文：專案組
已育有兩女一子的陳浩民夫婦，現在再添一名千金。
|
鍾意就快D Share啦！
|
|
|