娛樂偵訊
熄燈前最後騙案 亞姐二、三名從來冇后冠
騙徒手法層出不窮。
亞視自易手王征後，騎呢事件無日無之。熄燈前更土豪式晒大箱銀紙宣布有錢出糧，隨即被踢爆「裝假狗」，當中以一百蚊紙幣扮一千蚊。順利駁回清盤令， 1/4愚人節熄燈，一直標榜良心電視台的亞視，對親生女亞姐一樣呃到尾，原來歷屆除了冠軍，亞軍和季軍的后冠是循環再戴，冇得拎走。
亞姐做遺作
亞視倒數，四月一日，有六十年歷史的亞視正式結束，熄燈閂門前最後一個節目，一直靠亞姐食胡搵銀的亞視，安排二○一三年亞姐特輯做遺作，向觀眾告別。
事實上，由亞視一手創辦的亞姐選美，自○四年復辦開始，就不停搞國內分區選拔賽吸金，但識生金蛋的亞姐，跟留守到最後的一批員工冇分別，一直被騙。
據了解，除冠軍外，亞軍季軍的后冠在加冕儀式後，便要上繳公司冇得拎走。
「好多亞姐最初以為后冠係獎品之一，其實只有冠軍，或者嗰屆咁啱有珠寶贊助商，佢哋先可以攞走，所以亞軍同季軍要將個后冠交番出嚟，條彩帶同膠獎座就可以攞走。如果想再戴個后冠，就要等下次活動，同埋佢哋要戴得好小心，因為要留俾下一屆亞軍同季軍再用。」知情者說。
俾錢都冇人造
雖然后冠只是假石朱義盛，不過美麗回憶就算唔值錢，不少得獎亞姐依然想擁有一個后冠作為留念。
「有啲亞姐好似黎淑賢、曹央雲，幾年前開始已經搵亞視去搞，打算造一個一模一樣嘅后冠，仲講明自己俾錢，（葉）家寶亦答應幫手搵廠做，但呢一年佢淨係忙住追老闆出糧，都唔得閒，佢走埋就更加冇人理。」知情者說。
就此，九五年亞軍黎淑賢，向本刊承認曾接觸過葉家寶。
「兩年前開始搵家寶幫手，亦都有搵過負責亞姐嘅同事，但佢哋兩個都走咗，而家都唔知搵邊個，唔知淘寶有冇得買呢？」
除了黎淑賢，九四年季軍曹央雲亦一直在等葉家寶回覆。
「當選時問過亞視，先知冇得攞番個后冠，我個女喺學校比賽贏咗都有獎盃，我哋只不過想攞番個 memory，好似九五年喺美國贏咗華裔小姐冠軍同埋另外兩個獎，大會都俾晒三個后冠我。因為亞視先有后冠個模，所以要搵家寶幫我哋搞啫。」
至於經歷過陪客伴唱等不快經歷而離開的○八亞軍顏子菲，則坦言冇諗過再造后冠。
「我哋戴嘅后冠由服裝部提供，用完就要還。呢啲道具后冠用咗幾年啦。」顏子菲說。
靠亞姐 cap水
亞視財困唔再揼錢製作節目，但仍堅持繼續搞亞姐選舉。事出必有因，原來在亞視眾多節目中，亞姐是唯一搵錢來源。不過近年亞姐選舉堅離地，總決賽前開始，一直穿州過省玩淘汰賽，北到青島、南到珠海，全因內地人對選美節目有興趣，可吸納不少贊助商科水贊助。成本低效益高，加上贊助商帶「鴨仔團」入廠睇比賽，又收多一筆，亞姐長做長 cap。
撰文、攝影、攝錄：娛樂組
|
鍾意就快D Share啦！
|
|
|