LV地鋪裝修期間，派出售貨員（前左）化身「人肉指示牌」，站在店外帶客人上二樓照常營業的鋪面購物。
財經專題
LV企街拉客 購物天堂變地獄
走在這條街上，香港人竟可以慢步而行；行入這裡的店鋪，香港人會有貴賓的感覺。你無睇錯，這裡是尖沙咀廣東道。
人民幣貶值，來港消費唔夠抵，加上反蝗行動，今日的廣東道，人龍不見了，但一間間名店因附着長約，被迫「屹立不倒」。名店為了搵錢交租，已使出「落地」自救措施。好像超級名牌 LV，裝修期間，為免客人行錯入 Gucci，竟派售貨員企街拉客，儼如地產經紀。 Gucci則向「本土客」伸出友誼之手，請睇近日 hit爆的 Art Basel，香港人再變貴賓。而曾經因為阻客人拍照而引發「公關災難」的 D&G，現在於鋪內任影唔嬲。
超級品牌 LV 企街拉客
經過廣東道，昔日人頭湧湧的 LV正在裝修，地鋪被白色板全包圍，但二樓繼續營業。不過記者發現，街上竟有三個穿上 LV制服的職員，有的掛上 LV頸巾，有的揹住 LV手袋，在街上拉客。這個高檔品牌 sales猶如地產代理，簡直難以想像。走到 LV的另一個正在裝修的側門門外，又有另外三個職員站崗。每當有疑似自由行行過，他們就會上前細細聲問是否要到 LV，「我哋二樓有開喎，你想睇男裝定女裝？」然後親自帶領他們搭電梯到二樓、仍正常營業的鋪面購物。每當有其中一個職員帶客離去，留低的職員就會用對講機，向上頭要求增援。記者上週多次前往海港城，發現無論晴天、陰天、雨天，拉客情況如常。職員也不滿說：「出面超大風，我而家好凍！」雖然裝修圍板已「雞乸」咁大隻字寫明「照常營業」，不過沒有殘體字，當然擔心自由行米飯班主會睇唔明，有站崗的 LV職員亦承認：「上頭怕客人去咗 Gucci喎！」
據知，廣東道 LV有三十多名員工，上司要求負責「企街」的職員要多主動出擊，但 LV售貨員一向較高傲，未肯完全放下身段。見記者不是自由行，職員並沒有主動上前幫助，但當記者要求帶上二樓，職員都算禮貌周到。時光倒流一年前，你想入廣東道間 LV買嘢，唔該先排隊登記。即使俾你入到去，如非說普通話，被白鴿眼是常識吧。眾所周知，過去 LV如何巴閉，拿 passport登記買袋，一年全球最多買三個，所以水貨客唔易做。但不論 LV及 Gucci等品牌，現時對這些「限購令」，已經「隻眼開隻眼閉」。
Gucci sell本土 請睇 Art Basel
Gucci所屬的 Kering Group在巴黎上市，集團還持有 BV、 YSL等品牌。今年二月公布去年業績，香港區成績比中東及南韓等地更差，按港紙結算，收入較上一年大跌兩成五。報告多次指香港表現差勁，因為大陸人不再喜歡到香港購物；相反中國遊客去了澳洲、新加坡、日本及南韓等地，但這些亞太地區的增長，都未能彌補香港區帶來的損失。有剛離職的 Gucci高級 sales透露，以往廣東道龍頭店，平日每日閒閒哋過百萬營業額，週末及假期更達過千萬，但近月，平日已跌到每日只有十多萬營業額，即是說成間鋪平均賣得三個手袋！
為救亡，去年底的 Gucci及 Prada等分店都曾劈價，低至六折促銷。但作為高級品牌，又不能夠經常減價自降身價。長遠來說， Gucci高層知道自由行去意已決，故惟有走回頭路，專心一意攻本土市場。 Gucci香港區職員透露，「個個星期都要搞小型 show，請香港班 VIP參加，今個星期又請佢哋去睇 Art Basel，仲請佢哋去後台同班藝術家傾偈，同埋睇 Gucci preview show。」他透露：「高層話香港都仲有好多有錢嘅本地人，過去幾年重心去咗自由行度，而家要搵番一班 sleeping customers喎。香港人某程度都難 serve，但要盡量配合佢哋，佢哋要換貨就俾佢哋換貨，對佢哋要特別有禮貌。」
D&G歡迎拍照 服務殷勤
殷勤的服務，本來就是服務業的基本精神，但如今卻成為各大品牌重新檢視的工作態度，可悲也！記者到 D&G放蛇，竟然有賓至如歸的感覺。在太古廣場的分店，人影都無隻，記者甫入店已有兩位店員歡迎。記者一副「混吉」相，先睇鞋、再睇銀包及袋，店員都笑笑口主動詢問：「個色啱唔啱？」、「係唔係太鬆？」、「呢款著落去會比較舒服啲。」而記者表示不合心水時，店員亦不厭其煩地展示其他款式。最令人難以置信的，是 D&G一二年曾阻止客人在門外拍照，指擔心櫥窗版權及拍下商品被製假貨，但現在記者在職員面前擺明為穿上的皮鞋影相，售貨員亦表示無問題。
好景時，一般進取的名店 sales底薪連佣金可達四、五萬元，但自從自由行不再來，很多名店售貨員只能獲得每個月約一萬元的底薪，但卻要企足十多小時，故近月流失率十分高。有行內人透露，大部分品牌一方面容許自然流失，但同時開始改變佣金制，以往要跑到一定金額才有佣金，但現時可能不論金額，只要跑到三件貨，都按比例有佣金。所以即使你入去只是買一個鎖匙釦，一樣享有殷勤服務！
TOD'S進駐新界 開 pop-up store
名店退租轉位潮，二線品牌 Coach於蘭桂坊街頭的龍頭店，去年底正式結業。事實上其租約，要到一七年十月才完結，足足提早兩年退租，業主是李國寶家族。地產界傳聞， Hermès亦打算開價十五億元，出售旗下於中環的自置物業，賣得成認真好過賣手袋！不過並非個個品牌能夠話走就走，據知九倉旗下的海港城及時代廣場，與大品牌簽訂五至七年租約，有經紀指即使名牌要蝕錢都要捱，「排海港城條 waiting list好長，你走咗大把人租。到個經濟好番，你想返嚟未必返得到。好似 Hugo Boss喺對面街租咗個巨鋪，但生意始終都係唔夠海港城嗰邊好。」
現時市況，名店走唔到，又唔敢隨便擴張，便索性玩 pop-up store（快閃店）。上個月 Burberry曾在沙田新城市廣場一期的商場中心位置開檔，但今個月就被另一品牌 TOD'S取代，記者向新城市的客戶服務員查詢，她表示：「都係開咗個幾兩個月，賣頸巾同幾件大褸，都係好少物品。」記者亦走到 TOD'S的快閃店查詢，店員坦承今次是品牌第一次到新界區開店：「我哋都係開三個月，同法拉利合作為主，啲款同出面嘅唔同。」不過記者見客人不多，生意麻麻。九龍站 Fendi主鋪正在裝修，亦走到商場中心開短期 pop-up store，雖然人流甚少，但賣得一個得一個。在中環皇后大道中核心地帶、持有鋪位的科達集團主席湯君明，指現時名店縮皮，要搵名牌進駐大鋪，難度甚高，「我個鋪依家要搵化妝品店承租，唔係好大間、唔係做遊客生意嗰啲，不過仲未搞掂，個價未傾成。」
撰文：梁佩均、梁延宇
攝影：廖健昌
資料：黃家慧
插圖：朱桂葉
ed_bn@nextdigital.com.hk
|
鍾意就快D Share啦！
|
|
|