豪語錄
追夢 王灝兒
從小到大可以一帆風順，無需經歷挫敗，多少靠運氣推助成為人生勝利組，可能是不少人的願望。不過無風無浪係咪真係咁理想？
想當年 JW在學界歌唱比賽贏過唔少獎，後來更盲打誤撞簽約黎明，星級靚招牌仲唔係半個身踩入人生勝利組？
花上五年大好青春，換來迷一樣的神秘形象，局外人覺得出師不利：無聲勝有聲的策略，對今日呃 like世代來說，可以話帶來負面作用，大眾的好奇心着重於表演者每日發放的生活逸事，「我幾接受呢樣嘢，咁樣同大眾會親切啲，仲可以日日同佢哋（觀眾）溝通。」一句到尾要夠貼地。
到 25歲覺得要變，跟住膽粗粗提前解約，轉會並帶埋真名王灝兒再戰江湖，印證八、九十後新青年奉信的理想主義，要將興趣化成個人事業。雖則現實社會的確殘酷，打擊好似無休無止，要成功除了靠運氣，有實力有毅力都包含在 package裡面。
返 preschool
先入為主覺得菲籍血統點都有啲音樂細胞，混血 JW歌喉應該是天生，誰不知其實本是狂舞派，原本鍾意跳舞，唱歌都因為家姐。
「其實本身我冇諗住做歌手，只不過家姐鍾意唱歌、鍾意參加歌唱比賽，咁我細個又鍾意乜都跟家姐，中六時候就去參加咗第一個 singing contest，之後贏咗先發現原來我都得喎，就係咁參加比賽。好有緣咁，有個朋友介紹話 Leon想簽新人，想唔想見吓佢？咁我就 OK， why not？咁見咗，就簽咗啦。」
純粹唱歌當興趣，貪有時可以上台玩吓，唔怕醜仲好享受成為舞台上的焦點。其實 JW骨子裡已藏有做歌手的基因，咁簽咗 Leon五年來，除咗得到一份神秘感，仲有觀眾睇唔到嘅經驗。而這一刻 JW經已轉投新唱片公司，仲有兩首反應極佳的新歌撐住，諗番轉頭，未必係因為做得太少，或者 Leon嘅策略唔啱。「佢其實 very nice，因為佢自己都係藝人，經歷咗好多嘢，佢都唔想我哋去經歷啲唔需要、好辛苦嘅嘢，又會教我哋好多嘢，介紹好多人俾我哋識。
「頭三年讀緊大學，變相好似 partime咁，又要讀書又要工作，好難不停工作，所以返嚟之後要 catch up番。我諗當時我哋個方式同 style係比較低調比較神秘，個 strategy係比較唔同。」
好似捉錯用神咁，幾唱得都好，彷彿都搞唔掂，但換個角度睇，好似返 preschool，正式埋位前先備課囉！
「大家其實係 experiment，我哋同陳善之都有傾過，大家去試吓磨合，睇吓係唔係適合大家，又可以俾我經歷吓，學多啲嘢。過咗五年我想去 explore唔同嘅嘢，想去試吓其他 different ways。我都有同 Joe講，佢哋都覺得好吖，都希望我去唔同地方發展，去嘗試。」
跳出去
時機到想改變，趁青春去闖一闖是無可厚非。「自己啱啱轉二十五歲 quarter life，需要為自己將來小心諗清楚，問自己想要啲乜，咁啱 A Music嗰時我有同新公司 Sunny Idea合作拍 YouTube片，我覺得有時喺腦 click一 click，需要 make a change，見過老闆又覺得可以合作，再問公司可以離開。
「合約仲有一段時間，都有同公司傾我有啲想法，想再 explore吓新嘢，完咗先 confirm新公司。」
初試啼聲未如理想，再簽新公司之前都有想過要實際。
「我會俾時限自己，如果我去到幾多年都好似唔 work喎，咁就要去做啲 practical嘅嘢，我唔可以浪費自己時間，做人要 practical啲嘅。轉咗新公司之後出咗《矛盾一生》同《多少年》，個反應好好，原來我可以繼續做落去，可以繼續追呢個夢。
「再俾我揀都會入 A Music，佢俾我嘅嘢實在太多，有保護式嘅環境下栽培我。從頭嚟過都會行呢條路，我都想完成我嘅學業。之後 A Music要隔住隔住，一段時間又可以靜落嚟，會令我珍惜而家所有嘢，覺得揀得啱。」
話說當年簽 A Music之後入大學選科， JW本身好現實想報 Business，不過諗住都會做歌手，不如揀自己鍾意嘅科目，於是就讀咗地理。「咁讀呢科有好多嘢可以做，可以去教書。」有兩手準備，點都安心嘅。
谷宣傳
舊年改投 Sunny Idea，第一首派台歌《矛盾一生》於網絡進行鋪天蓋地式宣傳攻勢，唔再低調，五個月共有五百多萬點擊，成績驕人。高登仔亦開 post討論 JW，認為中晒年輕群組，不過唔夠入屋。
「而家係不停 social media同 online，成個 industry去 basic on、去 promo都唔同咗，咁啱自己公司都有 online production嘅嘢，變咗成個模式同 A Music係兩樣嘢。我幾接受呢樣嘢，同大眾會親切啲，可以多啲同佢哋溝通，日日話俾佢哋聽今日有做緊啲乜。」
有拍過教化妝片，又同坤哥 jam歌拍片，九十後喜歡 share，亦深明這個是自我宣傳的理想平台。
「如果我唔係做歌手，我唔需要成日對住個電話！做歌手做藝人冇得再神秘，再神秘就冇人知你做咩，所以我覺得而家好靠 social media，要 constantly去 share啲得意嘢俾人睇，我覺得都幾開心。」
唔比較
有說 G.E.M.同 JW係好朋友，大家一齊參加過歌唱比賽，前者贏咗冠軍被簽咗做歌手，幾年間被稱宇宙級去世界巡迴演出；亞軍 JW二次起步，先叫正式開始。講真，關係有幾 close？
「我哋間中會出嚟見吓面一齊玩，我哋有 group of friends嘅，係 common friends嚟，其實識咗好耐，中學唱歌比賽已經識。」
背景相若，會唔會比較？
「好難 compare，佢同我行嘅路好唔同，佢而家已經周圍去 tour，我而家慢慢 build up我個 foundation喺香港。自己行緊條路都非常之滿意，我係跟住自己嘅腳步。
「大家公司成個 strategy都好唔同，佢係多啲 go outside of Hong Kong。佢係唱作，自己作曲，我就冇作。」佢形象都好唔地道，「我覺得好個人口味嘅，佢自己鍾意點去 style自己，或者著咩衫會自信啲，好難講。」
講到比較，以前都有人話 JW似衞蘭，今日有 G.E.M.搶呢搶路，面對各種評論，自己調節最重要。「 It's come in with a package。連 Justin Bieber咁紅，都起碼有五十萬人唔鍾意佢。呢個世界一定有人唔鍾意，你唔可以滿足晒全部人，所以我愈大就愈覺得，做好自己囉！」
壓力來自點樣愈戰愈強，多過面對負評。
後記
處於一個篤信網絡的時代，大家唔再迷戀平面明星，反而喜歡好似你同我一樣的立體人物，一樣會約朋友行街食飯去玩，好似隔籬屋個坤哥咁，都食 canteen，咁先稱之為貼地。
見過 JW搭枱食米線，自己都話：「入行之後發覺其實冇咩唔同。」自嘲樣唔靚、鼻大、唔高仲幾肥，訪問全程認真對答之餘，經常笑唔停口，唔扮高竇混血兒，走親和路線。
人就係咁，相對於自信滿滿的宇宙級數，你會 buy你隔籬位個 friend多一點。
撰文：蘇韻詩
攝影：黃志明
攝錄：胡春輝
化妝： Sheryl Chan
髮型： Harry Lau@Ihair alpha
服裝提供： Cocktail、 Cynthia& Xiao、 Electric Sekki
|
鍾意就快D Share啦！
|
|
|