探熱針
殺入《我是歌手 4》決賽 李克勤全靠 8包中藥
過去三個月，經過十一次過關斬將，李克勤成功殺入《我是歌手 4》總決賽，更是首位躋身入總決賽的香港男歌手，不過，由於同期要應付自己和容祖兒的世界巡唱，壓力轟炸下，令他快速消瘦十多磅。
「好恐怖！唔係身體疲倦，係精神上疲倦！」克勤說，每次北上出戰，都會帶埋秘密武器，八包中藥！
空中飛人
上一回，李克勤搵 C AllStar和唱《天梯》，得第二，上週五（三月二十五日）《我是歌手 4》的第十一集，克勤終於憑《我不會唱歌》奪冠，成功進身四月中的總決賽，而參賽以來，他更多次放棄唱國語歌，先後八次用廣東歌出戰。
「我覺得我作為香港歌手，好想唱一啲好能夠代表香港嘅歌！」李克勤堅持，寧願放棄優勢，忠於自己的原則。
出賽《我是歌手 4》，還要兼任主持，同期更要應付自己及容祖兒的世界巡唱，壓力之大，是入行三十年來前所未有。
「農曆新年嗰段時間，要連續錄兩集，錄完就即刻飛去馬來西亞做除夕騷，年初一返香港執過批衫，又即刻撲去拉斯維加斯，同 Joey開騷，唱完直接由西岸飛去長沙做錄影，跟住再由長沙飛去紐約開騷。諗番轉頭，真係好恐怖！以前更忙都試過，好似拍劇得兩個鐘瞓，但就未試過精神壓力咁大！」李克勤說。
可瘦不可病
體力透支，加上精神壓力，李克勤三個月瘦了十二磅。
「出騷或者演出，以前我會食飯，但依家貪快，我改食營養包，其實飲食習慣冇大變化，只係壓力大唔吸收，所以先瘦！瘦到啲人問我係咪唔舒服？以為我身體出咗事。」
要長期打仗，李克勤可瘦不可病！為了保住副偈，過去三個月，長期食住中藥，做藥煲抗感冒。
「除咗調理身體，啲中藥主要係防感冒，因為係咁飛，抵抗力會差，如果一病就好大鑊，所以一路都食住中藥。」
隨時家變
《我是歌手 4》令李克勤在內地爆紅，搵上門的歌唱比賽及真人騷，超過十個之多。
「暫時未知做唔做，應該都會抖吓！我成日同人講，如果《我是歌手 4》要做一年，我會家變！呢三個月，自己對屋企完全冇出過力，太太好辛苦，好似所有嘢都係佢頂晒，佢又唔好意思煩我，因為見我成日皺晒眉頭，好得人驚！其實佢真係好體諒我，覺得今次比賽對我係挑戰！
「我覺得每個工作都係緣分同機會，你揀工作，工作都會揀你，所以有得做，就要盡力做到最好。」李克勤說。
撰文、攝影、攝錄：娛樂組
|
鍾意就快D Share啦！
|
|
|