蠱惑鄧健泓烏龍求婚石詠莉爆喊應承
現年41歲的藝人鄧健泓（Patrick）與29歲石詠莉（Sukie）拍拖逾三年，一直恩愛，前晚Patrick趁女友在頒獎禮奪兩獎，即開驚喜Party並跪地送花送鑽戒求婚，感動狂喊的Sukie點頭首肯做「鄧太」，可說是三喜臨門，不過Suki不忘笑Patrick求婚時雞手鴨腳亂晒龍！
鄧健泓（Patrick）入行十多年，情史比演藝成績更多姿多采，曾與原子鏸、李施嬅及龔嘉欣拍拖，2012年與前Freeze成員兼歌手石詠莉（Sukie）撻着，一直感情穩定，並共同製作Hi-Fi碟，前晚Patrick趁女友攞獎跪地求婚！
前晚Sukie於「IFPI香港唱片銷量大獎2015頒獎典禮」上雙喜臨門，憑首張Hi-Fi碟《聽聽Sukie's》勇奪十大銷量廣東唱片及躋身十大銷量本地歌手，Patrick特別在尖沙咀某酒店舉行驚喜派對，邀請逾半百親友出席，包括雙方家人及Sukie老闆蕭定一等。Sukie踏入宴會廳驚見親友拍掌歡迎已狂喊，這時台上的Patrick說：「呢兩個獎對我哋好大意義，我哋目標係IFPI，結果我哋做到，我哋做每一樣嘢都有目標，人生係、愛情都係，所以今日我想做一樣嘢，佢成日話我未求婚，我想喺正確時間求婚！我想講，多謝你，我唔富有，我會將我最好嘅同你分享，以後都係，永遠都係。」
出動99朵玫瑰
此時Patrick手拎99朵粉紅玫瑰，拿出鑽戒跪地向Sukie求婚，期間他緊張得不停傻笑，並發表愛的宣言：「呢三年我哋經歷好多，經歷佢最唔開心時間，亦試過一齊做啲嘢有成績，希望將來我哋一路喺呢條船度繼續向前行，你願意嫁畀我嗎？」全程爆喊的Sukie點頭肯嫁，Patrick為她戴上鑽戒，兩人在嘉賓起哄下親吻，溫馨感人。
事後Patrick受訪時表示花了近一個月時間籌備派對，但求婚時腦海一片空白，問到求婚鑽戒有多少卡？他說：「價錢唔緊要，最重要誠意，我就算畀隻草戒指或者汽水樽蓋佢，我諗佢都會應承，因為佢已經知道個情意。」何時註冊結婚同擺酒？他表示今年是盲年，亦想等女友今年完成第二隻Hi-Fi碟後才計劃婚事。
「好多回憶出咗嚟」
至於Sukie受訪時聲音沙啞，她笑言因派對上哭得太多所致：「事前真係唔知，只係覺得有啲奇怪，身邊朋友有啲唔尋常，Patrick又有啲電話蠱蠱惑惑，仲以為佢做嘢辛苦又唔想我擔心，原來搞緊呢樣嘢，佢願意為我付出，係冧爆嘅！尋晚拎咗兩個對我人生好有意義嘅獎，之後發生嘅事仲咁驚喜，突然間好多回憶出咗嚟！」
Sukie讚Patrick細心，連現場布景板也選她最愛的紫色，但她笑指未婚夫烏龍亂晒龍：「佢雞手鴨腳，唔知應該畀花先定畀戒指先，旁邊好多人畀意見，好搞笑，但對我嚟講佢做足晒所有嘢，我好滿意，同埋要讚佢演技好！（求婚戒指幾多卡？）唔識分，對我嚟講係個心意，我唔需要大粒，依家幾時擺酒都未定，要雙方家長再出嚟食飯，到時再同大家分享。」
文：影視組
|
鍾意就快D Share啦！
|
|
|