娛樂偵訊
律師男友錫晒 張名雅撞車唔肉赤
12年港姐冠軍張名雅，幕前發展一直不及同屆朱千雪及黃心穎，唯獨在緋聞榜成績，就大大拋離兩位姊妹，之前有指被傅明憲前度莊家彬睇中，最近又另結新歡，被拍到跟律師男友蔡錦豪（ Joe）在馬場啜爆。
日前，張名雅遇交通意外，被新牌仔撞到車尾，但呢頭撞車，嗰頭冇件事照同朋友 tea，有男友錫住，特別疏爽！
進取識筍盤
張名雅向來進取，總要有個喺左近的她，經常叫朋友介紹筍盤；早前她被拍到在馬場跟新歡 Joe啜爆，二人拍拖三個月，日日陪住男友，非常開心！
「 Carat（張名雅）未同 Joe一齊時，佢會好積極去 ball去 party，又會 join埋 Alex（楊受成兒子楊政龍）班朋友一齊玩，睇吓有冇好嘢！今年初傳佢同莊家彬撻着，其實佢哋兩個只係一齊去 ball，但莊家彬同 Grace（程新惠）冇分手，所以都冇下文！之後喺朋友 gathering識到 Joe，佢搵到錢又識得煮嘢食，都係筍盤。」知情者說。
Joe（蔡錦豪）是執業律師，同時亦是香港政協青年聯會成員，亦認識不少馬主朋友，當日二人被拍到啜爆的地點，也是在馬場餐廳。
「 Joe鍾意去馬會，因為唔多人。除咗馬場，佢亦鍾意同女朋友一齊做運動， Carat同 Joe一齊之後，亦弗咗好多。」
求救阿媽
有愛情滋潤，張名雅連撞車都當冇件事。事發當日，張名雅揸住價值四十多萬寶馬坐駕離開沙田「名城」寓所，出停車場時被尾隨的 van仔撞到車尾，她落車了解情況並即時致電媽咪求救，張母出現後，二人見坐駕未有明顯損毀，於是抄低對方電話便離開。
被人撞籮柚，但張名雅心情完全不受影響，之後會合幾個朋友在 ifc飲下午茶，跟住入 Apple Store打個圈，又去買雪糕食，食完走去 Victoria Secret買內衣，之後去埋超巿買沙律，非常充實。
撞完車食食食
又密又雜
張名雅一直被無綫投閒置散，事業運麻麻，但桃花極旺，男友質素亦十分參差，換得好密。
13年 MK舞蹈員
張名雅與衣著 MK、貌似本地漫畫家甘小文的舞蹈藝員行街，二人繑實，表現親暱。
14年 辣跑男友
曾被拍到與揸 200萬瑪莎拉蒂的有米男，在中環繑住行。
15年 金融才俊
與從事金融業的圈外男友拍拖， 14年尾齊齊去中環參加夜跑，令戀情曝光。
撰文、攝影、攝錄：娛樂組
|
鍾意就快D Share啦！
|
|
|
