熱爆娛樂: 台北斷正　半夜 3點攬實　柯震東介入搶超蓮 [壹週刊

2016年4月21日星期四

台北斷正　半夜 3點攬實　柯震東介入搶超蓮 [壹週刊 - 1363] __,柯震東,何超蓮,超蓮,M1,

超蓮飛到台北搵柯震東陪玩，兩人深夜去唱 K玩天光，其間柯震東一手將超蓮攬到實。

娛頭

台北斷正　半夜 3點攬實　柯震東介入搶超蓮

賭王何鴻燊「最索千金」三房超蓮，自從去年宣布同台灣藝人吳克羣分手後，即成為搶手貨，一班有米「富二代」爭住搶蓮。

被一眾觀音兵狂追，超蓮亦享受多於厭煩。而最新加入戰團的新兵，就有台灣吸毒帥哥柯震東。上星期，超蓮特登飛到台北，半夜三點陪柯震東唱 K，等𨋢上房期間，兩人貼實攬埋一嚿，極之親暱。

似乎超蓮特別鍾情「台菜」，其他富二代真係要加把勁。

戰鬥格飛台

去年十二月，何超蓮突然公布同拍拖四年的吳克羣玩完，重新上路，超蓮迅即成為超級搶手貨，一眾富二代包括霍英東長房孫霍啟山、中國星老闆向華強兒子向佐，及內地地產商香江集團主席劉志強兒子劉根森，爭相向超蓮展開猛烈追求攻勢，不過，大條道理吊起來賣的超蓮，只暫時將他們收兵旗下，未有定案。

據本刊了解，蓮兵團最近又增添新成員！正是台灣藝人柯震東，二人同齡廿四歲，無論外形、年齡、嗜好，都襯到絕。

對靚仔柯震東睇高一線的超蓮，上星期日，她專登人肉速遞到台北，密會新歡柯震東。

凌晨三點，超蓮與柯震東孖咇出現台北忠孝東路的 KTV，同行還有一男一女朋友做掩護，當日超蓮打扮戰鬥格，尤其腳上一條露出四分一 pat pat肉的超短褲，火熱誘人。

痴纏

搭腰

雖然大堂人來人往，但柯震東都伸手去拖超蓮。

一手扯埋身

等電梯期間，柯震東突然向超蓮展開攻勢，首先出手拖實對方臂彎，繼而再將超蓮扯入自己懷中；只見超蓮毫不抗拒，更十分配合，將自己個頭挨落柯震東膊頭上，貼實無縫！

兩人動作合拍，就算電梯大堂人來人往，他們都毫無避忌，之後攬埋一嚿，搭電梯上 K房繼續 happy。

「超蓮睇《那些年》嗰陣，已經好鍾意柯震東，覺得佢好靚仔，不過當時佢有個吳克羣，對柯震東只係追星迷偶像嗰種。之後大家亦有喺其他 party聚會撞過頭，不過就冇乜傾偈，唔熟！直到幾個月前，有啲共同朋友約出嚟一齊玩，佢兩個先真正認識交換電話。加上呢排柯震東同女友李毓芬冷戰，所以佢就轉軚係咁搵超蓮，開行馬力追。」超蓮身邊人說。

吸毒事件後，柯震東同房祖名仍然是好兄弟，月初更一齊在台北睇陳奕迅演唱會。

二月超蓮同吳克羣已分手，但影到超蓮去到台灣搵吳克羣，兩人更挨住返回吳克羣屋企，但事後超蓮堅決否認復合。

去年十一月超蓮同吳克羣冷戰，吳克羣專登飛來香港找超蓮箍煲。

風騷回應

週二（四月十九日）凌晨，超蓮在銅鑼灣參加完朋友的生日 party，離開時，本刊記者上前問她與柯震東關係發展到何階段時，她全程春風滿面，有問必答。

壹：壹週刊　蓮：何超蓮

壹：上星期去咗台灣玩？影到你同人去唱 K，是否有新歡？

蓮：係呀，我去咗台灣玩，嗰晚同一大棚人去唱 K，冇新歡呀，我單身，問佢（身旁的 JW）最清楚我，我單身㗎！

壹：影到柯震東攬住你，好親密喎！

蓮（非常愕然）：佢攬住我？唔會，我哋係普通朋友。（壹：但係影晒相。）吓，咁搞笑？係咪因為人多，佢 gentleman扶一扶我咋？

壹：你同柯震東係乜嘢關係？

蓮：普通朋友。

今年廿四歲的超蓮，是賭王眾多女兒中最索，有樣有身材，加上沒有公主病，是城中首席筍盤，難怪勁多人追。

霍啟山同何超蓮四度約會被斷正，三太更講明開綠燈。

冇同吳克羣講

壹：克羣同柯震東識唔識？

蓮：我唔知佢哋識唔識。

壹：同柯震東識咗幾耐？

蓮：幾個月囉，唔係好耐之嘛。

壹：係咪特別心儀台灣男士？

蓮：冇心儀任何男士，我依家心儀我嘅事業，希望快啲開餐廳。

壹：之前柯震東吸毒，你會唔會介意？

蓮：普通朋友，交朋友唔會理呢啲。

壹：克羣知唔知你同柯震東咁 friend？

蓮（態度突變）：我冇同佢講嘢，同佢係朋友，冇乜點傾偈，費事啦。