探熱針
四歲兩文三語 劉華計劃外放劉向蕙
劉華寶貝女劉向蕙（ Hanna）下月便滿四歲，去年考入老牌名校德望幼稚園一事曝光後，劉華立即啟動 plan B，轉讀保安嚴密的維多利亞幼稚園，務求囡囡生活不受外界騷擾。半百得女，劉華對女兒亦相當有要求，一歲半開始力谷兩文三語，操得一口流利英語及普通話的劉向蕙是精英學生，虎爸下一步計劃是送囡囡出國，在更不一樣的環境下學習。
專登遲到早退
本週一（四月十八日）中午，讀緊 K1的劉向蕙，坐住黑色七人車，在保鏢車護駕下放學，為確保安全，向蕙 BB永遠遲到早退，沒有規律性時間。是日她在保母陪同下，行到連接學校另一秘密通道上車，離開返家。
上週五，向蕙 BB不用返學，媽咪朱麗倩未有鬆懈。早上九點多，已經安排節目給女兒，兩母女由屋企出發，到尖沙咀 Pacific Club玩了一個上午，食完午飯逗留至下午兩點幾，才在保鏢護送下離開。
現場所見，懷有第二胎的朱麗倩十分小心，全程交由外傭姐姐抱女，自己只在旁貼身打點。
對自己要求極高的劉華，當然不想做虎爸，但香港讀書競爭大，劉華就算不要求囡囡贏在起跑線，亦不可落後於人。
「 Hanna一歲半劉華已經搵咗兩個老師返屋企幫佢補習，一個英籍老師教英文，另一個北京老師就教普通話，所以 Hanna發音好標準，細細個已經兩文三語，喺班中成績亦特別標青。」知情者說。
次次都過到關
身為天王女，在香港讀書難免有所不便，不想愛女的童年受到外界干擾，劉華有計劃數年後，送向蕙 BB出國讀小學。
「佢舊年去創價（幼稚園）面試，冇幾耐就俾啲家長喺網上親子討論區踢爆，搞到佢即刻轉去德望，點知朱麗倩帶個女去學校做校服同影學生相時，又俾傳媒發現，搞到劉華又再同佢轉校。
「好彩 Hanna好聰明，面試英文普通話都好流利，性格又活潑，老師對佢印象好好，所以每次面試都過關。劉華見個女讀書幾有天分，考慮緊幾年後送佢出去外邊讀，希望俾一個更好環境個女去成長。」知情者說。
天王老豆
四大天王之一的張學友， 13年曾將長女瑤華送到英國讀書，不過在外兩年，瑤華在去年初要求返回香港，廿四孝老豆立即安排她入讀位於屯門、學費每年十七萬的英國貴族學校哈羅，日日更加做埋司機，管接管送。
撰文、攝影、攝錄：娛樂組
|
鍾意就快D Share啦！
|
|
|
