《殭》劇中，陸永戲份不少，表現亦被觀眾讚生鬼。
娛樂偵訊
坤哥陸永 笑上位
要打造一線小生、花旦，隨時花上十年八年時間，反而食腦九唔搭八，仲易出到位。好似最近受無綫重用，力谷上位的吳業坤（坤哥），還有去年憑旅遊節目《 Do姐去 Shopping》人氣反彈的組合農夫（ C君、陸永），靚仔冇佢哋份，但勝在形象騎呢夠古怪，唧到你笑，殺出血路！
肥肉開心 share
一向肯搏肯捱的坤哥吳業坤，參加《超級巨聲 2》後決定休學入行，但多年來閒人一個，台慶扮棋、夜孖孖音樂節目《 360°》主持，直到去年尾憑一首《原來她不夠愛我》爆出，成為「大滿貫新人王」，人氣爆燈。
大台用得唔嘥，拍劇機會接踵而來。在有份參演的新劇《殭》，坤哥雖然冇王浩信弗爆身材，一樣夠膽剝衫剝褲，著孖煙囱上陣，裸俾你睇搶收視，唔介意將自己肥肉同觀眾開心 share，傻戇形象，成功搶鏡。
「無論以前，抑或而家紅咗，坤哥從來冇揀 job，其實『星娛樂』都有提出過，叫佢同無綫傾吓，係咪唔好做咁多騎呢角色；但坤哥好知道自己定位，覺得公司而家俾咗好多機會佢，最主要係安排多咗唱歌，加上坤哥覺得觀眾鍾意嘅，佢更加要做多啲，咁先唔會倒自己米。公司而家仲 plan緊，幫坤哥度身搞個真人騷節目！」一名無綫人說。
同又南再跑街
至於組合農夫（ C君、陸永），去年與 Do姐鄭裕玲合作旅遊節目《 Do姐去 Shopping》，成功人氣反彈，工作量倍增。
其中陸永繼《 Do姐去 Shopping》後，緊接有黃金時間出街的《殭》，劇中幾乎有謝安琪就有佢，戲份不少。
「監製就係覺得陸永有喜劇感，所以點名搵佢，為咗呢套劇，佢埋位兩個月已經搵師傅練武，嚟緊仲會同又南跑街再谷吓！」劇組人員說。
之前 talk show、唱片、拍劇同步進行，完全冇時間陪屋企人，觀眾反應好，抵番晒！
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|
