豪語錄
何處教吹蕭 蕭定一
蕭若元宣告退休，令人很自然想到令公子怎樣唱下去？
按常情，不外：一、規行矩步，以守成父業為榮。蕭定一卻道：「他是 artist，一直像畫家創作；我則管理娛樂公司，九成為生意而做。」打個比喻，老蕭是才子，小蕭是財主。
那麼，應該算：二、心裡不以為然，一心雄心勃勃要取而代之。蕭定一又說：「我完全冇反叛期。」
兩種皆非他諗法。旁人聯想可以千變萬化，其實造訪蕭氏總部便明白，蕭若元辦公室只與兒子隔塊玻璃，時而打牙骹，蕭太婆媳偶然結伴同來，最窩心還有小女孩蹦蹦跳跳逗爺爺、 daddy歡喜，典型三代同堂溫情店子。蕭定一說：「英雄多見亦常人，佢（指蕭若元）唔係咁神奇。」
但且慢，此情此景，蕭定一小時候沒經歷過。「與妻兒關係，我有信心處理得好過爸爸。你問成就，這方面我超越他太多了。」
當年鄧小平謝幕，繼承者江澤民引用杜牧詩句（如題）。薪火相傳，同樣的是，兩支簫都好吹得。
愈壞愈好
的確不存在可比性。蕭若元做橋王、名嘴甚或政治玩家；蕭定一則近年成為娛樂大亨——雖不算龍頭，卻一條龍服務，從經理人公司到製作到內地戲院以至收購 HMV。
「我稱此為直向連結。國內市場大，打橫專攻一瓣已賺大錢；香港較難，一定要從原材料到零售。好彩零售業萎縮，租金總算合理番（指 HMV的鋪）。
「我睇好娛樂，經濟愈不景，少咗傾生意，愈多咗陪親友或拍拖睇套戲。生意伙伴應酬是高消費，電影是廉價娛樂。
「當然更因為睇好內地票房。」
便不怕被假票房、幽靈場所騙？
「世人誤會了。幽靈場其實冇問題，是有人真金白銀買咗飛畫埋位要報數的，你可以笑片主戇居，但絕非假票房。例如《葉問》，我本身有營運戲院（雖然不多），所以知道，叫我賣飛我就賣。片主收唔番晒錢，只能收拆賬，大部分歸戲院。等如佢有份開餐廳，日日請朋友食，自己埋單仲入數，佢豪邁啫。
「包括《捉妖記》，中華光榮，畫啲飛囉。坦白講，如果我今日有套戲累積卅三億八千萬，與《美人魚》只差五十萬，我會（想辦法破紀錄），超過五十萬就不會。
精明若此，卻買下蕭若元麗的陳年舊電視劇。
「係我買，不是他買，佢驚我歸唔到本。」
算是送給老父的紀念品？
「他冇這種感情，最後他不理我，我也不理他。我就兩樣都有，一方面認為是不錯的投資，已經有人來洽商，另方面畢竟具意義。」
即係，骨子裡父子情，但不會宣諸於口，寧願利字掛帥。蕭氏家風。
漫步向西
既然北望，便不能「向西」了。上次《豪語錄》訪問石詠莉，從良 Sukie憶述組合 Freeze標榜整容和跑夜場遭禁錮的辛酸史，曾含糊答：「在哪裡遇險？一個西邊的城市啦。」令記者聯想，老闆蕭定一那種《一路向西》偏鋒，的確不宜一路衝下去，尤其要符合內地肯發批文的偽善。
「我家的格調是果敢，做夠，就做不同嘢。」蕭定一說。
一句今日的我推倒昨日的我，知易行難，才兩三年間的事。
「對我來說，真正現在式只有明天和後天，大後天又唔知發生乜事。
「何況， Freeze概念很好，只不過三個成員擺唔埋。標榜整容、性感，係啱嘅，有機會我想再搞一次。 Sukie表面上藝術成功（出 HiFi碟），但商業上， noise，還是 Freeze佔優。
「艷情片不能上大陸，我仍會在互聯網諗。我變成有節奏地漫步向西。」
亦非關有女初長成——雖然記者以為隨着蕭千金日漸懂事，為父怎好意思大度三級橋？
「她還會繼續上來公司，我會解釋給她那是做給成人的娛樂。為什麼我不吸煙？因為六歲時蕭生（蕭若元）已俾我食，自此厭惡了。不可在無菌環境長大，十八歲先？咪傻啦。」
之但係，人人因自幼接觸有了免疫力，將來豈非影響電影收入？
「總係少數。大氣候依然保守的話，只會愈好奇愈多人睇。」
《 3D肉蒲團》的肉人代代教吹簫下去。
回家
但有些事情，畢竟默默地改變了。
訪問預設於七時半前完結——有飯局？「係每晚習慣早返屋企。以前是回家吃飯要特別通知；現在是不回家吃飯才特別通知。
「七點半後不談公事。上次你來訪問我，我很忙，斷斷續續的。後來領悟到欲速不達、過猶不及，於是訓練同事去做。收工之後家庭時間，同事非生死關頭的問題我都不答，只反問：『依家幾點？』結果他們往往能自行解決。
「我兩年前信了主，開鏡擇日本來就不在意，現在更不能上香。同事求安心，彼此尊重信仰。是感召，覺得有人 call，係時間，老婆從無逼我。我不掛在口邊，但有祈禱。拍三級片，同食飯一樣需要，很少同教友討論此話題，卻深信我的宗教能明白。
「我的作品，『掛狗肉賣羊頭』，情色、坐監，最終返回人性和家庭，同耶穌理念相似。黃洋達話《肉蒲團》係福音 AV，道德地獄，慾念天堂。」
攬住寶貝女並非拍照需要，她整個下午自出自入，還有對孖生弟弟年紀太細沒來公司——倒令記者聯想：蕭定一是否也偏心女兒？蕭若元便曾憶述只打仔不打女。
「我亦只被打過一次，除了不勤力讀書，我算乖。十歲前，很少見到爸爸，都由嫲嫲照顧；蕭生少返屋企，我的妹妹們比較介意，我就冇所謂唔識計較。
「傳統智慧，生女要『貴養』，讓她見慣世面，唔好俾冇教養冇上進心嘅男仔呃咗；生仔要『窮養』，讓他知道物質靠自己努力。我比蕭生嚴，不會令女兒公主病，搭搭電車搭搭巴士，接接地氣。
「人家說女兒是前世情人，我直頭覺得是今世情人，而且是老婆仲叫陪多啲去拍拖的小三。家庭比慾望重要太多了。」
都對都對，但當兒女進入青春期，便不是你願意黐家多些，而是輪到孩子根本唔願黐家唔俾你陪……
「到時，我還有老婆。計埋對仔，十年後，我五十四、五了，已經冇能力冇慾望。所以我成日勸男人，別太後生結婚。」
倦鳥
那麼重視家庭，父子大不同，沒怨過老蕭嗎？「年少輕狂，細個花心我都會，只不過他早婚啫。他虧欠的心比我們責怪他更重。
「溝女不能比較。我以前啲女要去溝的；他嗰啲係自己撲埋嚟，守株待兔就得。」
唯一相同是，近年父子倆均對政治意興闌珊。蕭定一說：「因為見不到解決方法。
「一係中國有民主，香港作為南方沿海很難影響到政治中心，等如妄想個老公變乖。
「一係取消一國兩制，是從冇存在，直接由中央管治。我咁講會俾人鬧，等如承認一切只係婚前氹你上床的虛幻承諾。
「一係就離婚，即是港獨，根本不可行——中四 B班都可以話自己獨立，唔同你玩，頭一行尾一行都可以獨立。
「所以，自從反對梁振英做特首無果後，我家已放棄，不如專心做生意。」
要睇大陸電影市場，的確少論政為妙。
「咁樣有道義啲，而且我現在未敢大舉進軍，賊佬試砂煲，等蕭生真正退休先啦，他不受控制的。」
直性子•曲線人
蕭定一其實幾坦率。反正要進軍大陸，暫停拍偏鋒電影，何不順勢自認痛改前非？他答：「那個不是我。」
在鰂魚涌的 office，附設迷你戲院、桌球枱、 cafe，才幾年，又計劃搬——咁捨得？蕭定一說：「我家族做建築生意就知，裝修根本好便宜。」
告辭的時候，蕭定一站起身說：「我也要去廁所。」等如送本刊記者到𨋢口了（洗手間在那邊），記者笑：「你應該省略這句，直接送客更令人感動啊。」他說：「唏，唔係咁講，有啲人會覺得太隆重，推來推去反而好耐走唔郁。」
世情複雜，直性子也懂走些曲線。
「何況我真係急。」拿他沒法。
撰文：余家強
攝影：黃志明
攝錄：葉志明
|
鍾意就快D Share啦！
|
|
|