網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2016年5月19日 星期四

見家長趕做拿督女婿 急聚兩粒鐘 楊明莊思明中環啜爆 [壹週刊 - 1367] __,莊思明,楊明,思明,M1,

娛頭見家長趕做拿督女婿 急聚兩粒鐘 楊明莊思明中環啜爆最近被爆跟拿督女莊思明拍拖個多月的楊明,為新劇《賭城群英會》開工幾乎長駐深圳,週日(五月十五日)晚,他一收工即撲返港,到中環接走之前同朋友gathering的莊思明,返山頂大宅急聚,小別數日的楊明更忍唔住,於上車前當街啜爆女友。據了解,第二日便要起程到馬來西亞的楊明,已plan好順道見家長,拜會在當地的莊思明父母,為做八億駙馬鋪橋搭路。主動開解 ...


娛頭

見家長趕做拿督女婿 急聚兩粒鐘 楊明莊思明中環啜爆

最近被爆跟拿督女莊思明拍拖個多月的楊明,為新劇《賭城群英會》開工幾乎長駐深圳,週日(五月十五日)晚,他一收工即撲返港,到中環接走之前同朋友 gathering的莊思明,返山頂大宅急聚,小別數日的楊明更忍唔住,於上車前當街啜爆女友。

據了解,第二日便要起程到馬來西亞的楊明,已 plan好順道見家長,拜會在當地的莊思明父母,為做八億駙馬鋪橋搭路。

主動開解

一三年,楊明跟圈外女友 Joanna由結婚變分手後,一直鮮有傳出緋聞,直至日前,才被揭跟莊思明撻着;事後,正在深圳拍新劇的他大方承認戀情,更自爆雙方於去年底合作《愛•回家》時,已經互有好感,但到個多月前,才正式開始交往。

「佢哋兩個好多年前合作綜藝節目已經識,不過冇乜來往,直至楊明有份拍《愛•回家》,同 Lisa(莊思明)有好多律師樓嘅對手戲,大家先多咗傾偈交流,加上當時 Lisa同 Victor(陳司翰)成日嗌交分手,楊明見到佢開工個樣好唔開心,都會主動開解,有咗比較,所以 Lisa開始對楊明產生好感,覺得對方份人唔錯。」知情者說。

二人拍拖不久,其實已經大方在 ig放閃,好 sweet。

朝早在深圳開工的楊明,收工即趕返香港同女友短聚,送埋女方返山頂屋企已經凌晨,真正踩足一日。

跟前度甩拖後,莊思明經常出席同事搞嘅飯局。

二十多歲時,楊明愛玩愛蒲, 04及 05年都試過醉酒鬧事,其後更被無綫雪藏以示懲罰。

在電視劇《收規華》有好表現,楊明亦開始受無綫力捧,愈來愈多機會。

電話求救

跟前度陳司翰拍拖五年,離合多次,關係一直拖拉,至數月前,莊思明決定真正斬纜。拿督女回復單身,與楊明一拍即合。

週日晚,本刊發現莊思明跟劉晨芝等一班老死,在中環伊利近街開飯,一小時後,就見到剛由深圳撲返香港的楊明出現。

在伊利近街來回行了幾轉,唔熟路的楊明最後要打電話向女友求救,未幾,便見到莊思明行出食肆,走到街頭接走男友。

連體嬰

10點到中環的楊明搵唔到路,莊思明走出食肆接他,二人即連體嬰行入酒樓。

莊思明約咗一班女朋友食飯,其中老死劉晨芝(右一)低胸短裙出現。

當街錫錫

食完飯,一班人喺門口吹水,楊明已經忍唔住喺朋友面前錫咗女友一啖。

肉緊啜爆

食到接近十二點,大家開始陸續離開,楊明跟幾名女性友人吹完一輪,才施施然拖住莊思明行去隔籬街攞車。

小別數日,拖實女友的楊明全程笑到四萬咁口,行到卑利街,見周圍冇人,即吼準時機,突然煞停轉身啜爆女友,被肉緊對待的莊思明,上到車仍忍唔住偷笑, sweet到呢!

急聚兩粒鐘,之後楊明送女友返回山頂大宅,在深圳開足一日工的他,揸車返回紅磡寓所,泊低車再拖住行李喼去便利店買日用品,然後才上樓休息,準備翌日出發去馬來西亞。

「楊明呢幾年劇接劇,舊年喺《收規華》做警察觀眾又鍾意,公司都開始俾多咗機會佢,所以今次喺《賭城》嘅戲份都幾重,以前𡃁仔鍾意玩又試過俾公司雪,佢知道要學懂珍惜,所以而家好俾心機做嘢。」知情者說。

啜啜啜

上車前,楊明見周圍冇人,即啜爆女友。

撇甩一班姊妹,楊明拖實莊思明離開,二人全程四萬咁口。

山頂大屋外貌。

家人唔 like

本週一(十六日),楊明跟翟威廉、唐詩詠等拉隊到馬來西亞拍節目《星級健康》,據知,莊思明亦校啱時間,返老家探媽咪,楊明亦已答應女友,只要攝到時間,便會蒲頭見家長。

「 Lisa同 Victor成日鬧交分手,但今次同楊明就完全唔同晒,拍拖拍得好開心,佢屋企人都覺得個女應該搵個對自己好啲嘅男人,所以之前佢屋企人都唔多 like Victor, Lisa亦好少安排佢哋見面食飯,但楊明就唔同,拍拖冇耐,佢已經好想帶男友俾媽咪見吓,直頭覺得佢係結婚對象。」知情者說。

對於胞妹跟陳司翰拍拖,莊思敏早已經唔睇好,公開跟楊明戀情後,她祝褔之餘,更寄語她千祈不要再跟前度翻撻。

跟躁底陳司翰拍拖五年,其間被拍到行街睇傢俬,不過二人離合多次,最後都係分手收場。

莊思明有個拿督爹哋,她會不時飛老家探親兼度假。

週日,她上載了在馬來西亞跟外甥外遊合照。

楊明跟陳敏之拖拉五年, 07年女方主動提出分手,前年亦已嫁圈外男友成人妻。

13年,楊明跟圈外女友 Joanna雖然影埋婚紗相,但最後因性格不合結唔成。

有女人緣

現年 35歲,出道時被指似謝霆鋒的楊明,因為性格爽直又幽默,一向好有女人緣,情史多籮籮。

02年

與索腿天后陳敏之撻着,拍拖兩年分手。 07年曾一度復合,但有指因男方花心,令陳敏之死心。

05年

有指楊明經常出入一姐佘詩曼於北角的香閨,不過二人先後否認。

08年

楊明與圈外女友 Elaine拍拖,網上更曾瘋傳二人的床照,但拍拖一年又散。

10年

與圈外女友 Joanna拍拖, 12年底,二人飛馬來西亞影婚紗相,並計劃 13年在尖沙咀美麗華酒店擺酒,可惜籌備婚禮期間,楊明與女友多次吵大鑊,搞到結婚變分手。

15年

楊明接受電台訪問時,承認拍攝《誰家灶頭無煙火》時因日久生情,一度愛上了龔嘉欣。

離離合合

莊思明與陳慧琳胞弟陳司翰拍拖五年,離合多次,數個月前二人決定分手,結束這段糾纏不清的關係,雙方更互祝對方有新生活,之後 Lisa火速戀上楊明。

11年 陳司翰與 Lisa被踢爆密會,拍拖一年,因男方被拍得在中環拖女, Lisa公開認分手。

12年  Lisa與一名德國及越南混血兒拍拖。

13年  Lisa被拍到與陳司翰秘密翻撻,事後她承認跟混血男已分手。

14年 翻撻後,有報導指躁底陳司翰令女友手腳受傷, Lisa出面否認,未幾,陳司翰再被影到偷食「 D奶妹」,二人再次分手。

15年 年初,陳司翰與 Lisa被發現又翻撻,雖然二人保持低調,但關係只維持一年。

億元駙馬

女星宏願釣金龜,但其實男星娶有錢女亦屢見不鮮,圈中億億聲的駙馬,愈來愈普遍。

布志綸@Mr.

樂隊 Mr.主音布志綸 14年底與「玩具富豪」陳明耀千金陳雪瑩拉埋天窗,太太家族坐擁超過十億資產,當時連譚校長都笑問布志綸係「娶人定入贅」!

黎諾懿

同落選富貴港姐李潔瑩( Nicole)拍拖四年, 14年拉埋天窗,女方在父親投資的美容公司任職總經理,打理十八間纖體美容中心分店,家族身家以億計。

吳家樂

吳家樂 06年娶其士集團主席周亦卿女兒周蕙蕙,成功做了過 50億身家的周家女婿。

撰文、攝影、攝錄:娛樂組


鍾意就快D Share啦!