娛樂偵訊
《矛盾》壓軸俾周庭谷爆 愛國何君堯搵女僕宣洩
由立法會主席曾鈺成同長毛議員梁國雄打頭陣的 ViuTV真人騷《跟住矛盾去旅行》，按綜合收視率 10.6%計，約有 68.9萬觀眾捧場，成為開台個多月來最高收視節目。
本月底，輪到《矛盾》壓軸一啤，同樣玩政見對立，「學民女神」周庭 VS愛國愛港的區議員何君堯。二人開拖唔係重點，核心賣點係俾周庭谷爆的何君堯，要靠日本女僕尋開心。
功夫一流
「學民女神」周庭原被安排同「尖啤」劉夢熊去旅行，但對方因妨礙司法公正罪成，即時還押收監而未能成行。 ViuTV惟有打其他建制派人士主意，但有「林日曦與蔣麗芸」做辦，搞到個個派檸檬！
最後，得愛國愛港的區議員、律師何君堯肯接招同周庭去日本。
一個前學民思潮發言人，一個獲「西環朋友」支持，兩個拍埋有幾矛盾係意料中事。由討論六四、 23條立法、國教及警民關係，雙方火花四濺。
據悉 53歲，仲要係律師的何君堯，同細自己兩 round的 19歲周庭隻鍊隻，冇着數之餘，更因為左閃右避，顯得好冇料到。
去完日本依然嬲爆嘅周庭，對本刊插何君堯花王上身，遊花園功夫一流。
「何生成日講好多冇用嘅說話，以環保角度睇好唔化算，勁遊花園。以我四年出道見過嘅人，佢遊花園真係數一數二，冇諗過佢對廢話嗰種執着咁強烈。」周庭說。
有骨落地
對住條頂心杉，愛國何君堯惟有喺日本女僕身上尋求「釋放」。話說其中一集兩個被安排去日本出名的女僕 Café開餐，勢估唔到，在青春可愛的女僕面前，何君堯是如此投入奔放；只見他聽晒女僕話，攞住支神仙棒同班𡃁妹一齊唸「咒語」，又扮兔仔，堂堂議員變得 cute cute，笑爆對手周庭同班幕後工作人員。
對何議員可愛一面，周庭繼續有骨落地。
「非常意外！女僕做嘅可愛動作，冇諗過佢竟然肯跟住做，在場嘅人都覺得好好笑。其實嗰幾日我覺得佢忍我忍得好辛苦，都好黑面。」周庭說。
何君堯 涉知法犯法
律師何君堯是屯門區區議員，是無政黨的建制派人士。 15年，身為「新界關注大聯盟」發言人的他，在《城市論壇》回應嶺南大學學生會會長劉振琳時，因自稱為社會工作者而引起爭議。
同年，特首梁振英委任何君堯為嶺南大學校董，亦受到非議，更在校內論壇被學生質疑他做了校董後有可能恃勢凌人，搞到拍枱離場。 16年，何君堯在 fb上載自己在高院疑似第 28號法庭前自拍，涉嫌知法犯法，成為網民熱話。
周庭 虛有其號
有「學民女神」之稱的周庭，是香港社會運動人士，曾經為學民思潮發言人，雨傘運動期間，因壓力過大而辭任。革命過後，周庭再度活躍，接受傳媒訪問，被網民指她只為宣傳自己，被質疑「學民女神」只是虛銜。
撰文、攝影、攝錄：娛樂組
|
鍾意就快D Share啦！
|
|
|