12年，孫穎以 20萬投得「 1 1OVE U」車牌。
娛樂偵訊
買 500萬超辣跑 孫穎載 77歲劉詩昆兜風
孫穎跟劉詩昆去年公開戀情後，女方更獲男友贈送過千萬定情鑽石戒指，有來有往，為氹男友開心，孫穎早前一炮過購入全港暫時只有一架、價值五百萬的檸檬黃 Bentley辣跑，男友沒有車牌，孫穎更願意做全天候司機。
簽字交收
上週四（五月六日）下午，由大型拖車載住的開篷黃色 Bentley跑車抵達沙田御龍山，新車落地後，孫穎跟劉詩昆校啱時間孖住出現，當日 30度高溫，唔想再等，待車行職員講解完新車設備後，孫穎亦隨即簽文件完成交收。見到新玩具，劉詩昆急不及待試坐一輪後，又拎住手機影相，相當雀躍。
「黃色 Bentley暫時全港只得一部，如果要買都要再等半年，其實 Samantha（孫穎）都冇諗過呢個年紀會再買跑車，事關佢十幾歲有車牌之後，第一架揸嘅就係跑車。直至早排去咗一個 party，老師（劉詩昆）試坐過呢部跑車，發覺夠晒闊落又舒服，喺 Samantha面前大讚，佢先決定扑槌俾錢。」知情者說。
女友做司機
由於經常中、港兩地走做表演，二人已經有一架由司機開的 Bentley房車接送出入，所以就算多一部辣跑，也只為滿足劉詩昆多年心願。
「劉老師一直想買跑車，佢之前試過 Benz，但發覺車廂唔夠闊，所以最後都打消念頭，而決定買 Bentley跑車， Samantha已經知道要做埋司機，事關劉老師冇車牌，多數都係佢揸。其實 Samantha近年比較鍾意坐火車，因為行車夠定，佢可以讀書寫嘢，多咗好多時間用。」知情者說。
近年主力發展兒童教育，在內地擁有二百多間幼稚園及音樂學院，孫穎經常都要返內地開會巡視學校，劉詩昆也間中返內地交流表演，業務穩定發展，但二人就未有結婚計劃。
「 Samantha都冇諗過結婚，佢覺得一紙婚書唔代表啲乜嘢，如果兩個人諗法一致，結同唔結都無問題。好似佢哋啱啱去韓國同意大利男高音 Andrea Bocelli見面，兩個人都好開心，劉老師仲即時喺現場彈咗一曲。」知情者說。
撰文、攝影、攝錄：娛樂組
|
鍾意就快D Share啦！
|
|
|