同欣宜由細鬥到大的謝婷婷，日前現身欣宜的車仔檔，幫手賣曲奇。
探熱針
突然 friend咗？ 欣宜拉婷婷做「賣餅女」
宣布唔再減肥，欣宜唔理世俗眼光做番自己。話咁快就打回原形，最近體重又再創高峰，保守估計接近 220磅，重形過航空母艦！但一樣無損欣宜嘅自信心，貼身衫、低胸裙一樣照著。
早前欣宜有新搞作，推出自家品牌 Homie cookies，用埋自己做生招牌，真係睇見都覺得肥膩！上週欣宜喺中環 PMQ開檔，一連五日欣宜親自到場拉客，睇檔、賣餅、數錢，一腳踢，好彩有唔少老友撐場，就連宿敵謝婷婷都嚟幫手做「賣餅女」。
一腳踢
投資六位數做賣餅，欣宜年初喺尖沙咀開短期 pop-up store，結果賺咗個 double。欣宜食過翻尋味，最近喺中環 PMQ開車仔檔，賣曲奇之餘，仲自創麻辣味雪糕，賣埋雪糕三文治，希望再賺一筆。
一連五日，欣宜都親自落場賣餅，由朝坐到晚， sell客、派傳單、包裝、收錢，仲做埋人肉布景板，任影唔嬲。現場所見，餅店好好成績，幾乎日日賣清光。
開胸 sell客
週日（八日），最後一日擺檔，欣宜瞓身 sell客。當日一早就到場坐鎮的欣宜悉心打扮，一條藍色開胸背心裙，露出大大對麒麟臂，側面睇完全冇腰冇線條。但係一𠌥低身，心口兩團肉，簡直令人窒息。
老闆娘當日表現非常風騷，出力𢱑生意，不時用高八度聲線拉客，加埋浮誇嘅表情同動作，果然有效，吸引唔少途人駐足。其間仲有客仔要求合影，欣宜都來者不拒，仲送埋嘟嘴、 V字 cute爆表情，交足功課。肥妹仔怕熱，唔夠半粒鐘，欣宜就熱到大汗疊細汗，好彩有「肥人恩物」風扇仔頂住，唔怪得欣宜行到邊吹到邊。
婷婷撐場
當日下晝，先有老友藍奕邦前來幫手睇檔，之後，同欣宜由細鬥到大的宿敵謝婷婷都現身撐場。同樣出身演藝世家，又同期出道，外間經常將欣宜同婷婷比較，以往同場碰面都冇乜兩句，原來二人暗地裡 friend底！一身工人褲帶住超的婷婷到場，坐埋一邊歎完雪糕，就開始做「賣餅女」，同欣宜一齊拉客。唔係自己生意，但婷婷都落足力，同欣宜你一句、我一句，不停 sell餅。兩姊妹又面貼面，攬埋一嚿玩 selfie，真係唔講唔知你哋咁 friend喎！
比下去
同在加拿大成長的鄭欣宜和謝婷婷，亦同是名人二代，二人相識於兒時，由學生年代開始，外界已經將欣宜和婷婷相提並論，其後雙雙加入娛樂圈，各方面都被網民作比較。
13年，張玉珊成功幫欣宜減去 90磅肥肉，成為修身堂生招牌； 09年欣宜暴食翻脹，加上張玉珊為求突破，物色同是星二代的謝婷婷任代言人，以噴血水著出擊，欣宜豐滿身形跟纖瘦婷婷形成強烈對比，被喻為肥瘦 Twins，曾令二人不和再度升級。
撰文、攝影、攝錄：娛樂組
|
鍾意就快D Share啦！
|
|
|