新娘手執嘅氣球花花，係佢自己扭，頭飾亦係自製，佩服！陪伴佢三十多年的加菲貓「阿肥」，著曬老西做「證婚」。
娛樂偵訊
低調出嫁 慳妹董敏莉結婚 look一腳踢
圈中喜事接二連三，月初下嫁永安太子爺的楊愛瑾（ Miki），在深灣舉行結婚派對。有人喜歡隆重留下浪漫回憶，亦有人選擇簡單實際。上月中 35歲董敏莉（ Monie），低調下嫁半百律師莊耀金，婚禮全程簡約，新娘子 Monie更以慳為原則，由頭到腳的結婚 look，一腳踢！
由頭到腳自己嚟
事先講明不愛鋪張的董敏莉（ Monie），結婚儀式果然一切從簡兼慳家，節儉程度比出名慳妹的鍾嘉欣有過之而無不及！在零婚紗零行頭冇 cocktail之下成婚，進入人生另一階段。
不求浪漫，但求實際的新娘子 Monie，當日身穿獲贊助的白色通花短裙代替婚紗，連幾千蚊置裝都慳番。至於頭上的喱士裝飾及手持的氣球花球，亦是她自製。新娘妝及 set頭， Monie都一腳踢自己搞掂。
律師新郎莊耀金同樣講求實際，喺自己地盤律師樓進行簽字儀式，一於自己婚事自己包辦。當日一對新人禮成後，繼續貫徹從簡宗旨，與十多名出席觀禮的親友到金鐘一間酒店歎自助餐，省卻 book場布置、安排座位的煩惱。
加菲貓做證婚
雖然婚禮超級簡約，但結婚話晒係人生大事，一對新人在宣誓一刻亦出現緊張，甚至喊咗出嚟。唔係感動到喊，而係笑到標眼淚。「簽字時，本來諗住好簡單嘅誓詞，老公亦揀咗個短嘅誓詞版本，點知兩句說話我都可以讀錯三、四粒字，佢都係，大家都忍唔住笑咗！」 Monie說。
不過真正笑位，是陪伴 Monie三十幾年，會不時跟她「傾偈」的加菲貓公仔「阿肥」，被新娘安排做「證婚」，嚇窒在場證婚律師。「阿肥嗰日著晒西裝咁嚟，我安排佢企喺做證婚嘅律師面前，個律師唔知發生咩事，我哋見到都忍唔住笑，笑到眼淚都出埋！」 Monie續說。
寶石嫁妝都唔晒
婚禮從簡，連婚紗都慳番！原來人妻 Monie講求環保，話結婚服著唔番，會好嘥！她說：「我同老公都係怕煩，結婚好多嘢安排對我哋嚟講係好大壓力，所以一切簡單。我唔係太鍾意傳統禮服，所以揀喱士短裙著，之後可以著得番嘛！」
連嫁妝佢都收埋，唔肯晒一晒。「其實媽咪買咗條紅寶石頸鏈俾我做嫁妝，但我怕大頭蝦整唔見，所以條寶石鏈同埋親戚送嘅金器，都統統只係收藏，冇戴。」呢個新娘認真另類！
撰文、攝影、攝錄：娛樂組
|
鍾意就快D Share啦！
|
|
|