林峯玩命血染紅館
前晚「Chok王」林峯的紅館騷開鑼，在女友吳千語及逾萬Fans面前半裸晒腹肌的他，玩命搏到盡，除了吊威吔在紅館山頂凌空漫步外，連飾物亦「暗藏殺機」，開場不久其左手手掌已被割傷血流如注！
歌手林峯前晚在紅館舉行《HEART ATTACK LF LIVE IN HK》演唱會首場，全場爆滿，女友吳千語、堂妹林夏薇、英皇老闆楊受成與太太、無綫高層樂易玲等捧場！林峯以多個Chok爆造型現身，更高難度玩命，舞台設有不少機關，他一度企上吊台及吊威吔凌空漫步，不料連身上飾物亦「暗藏殺機」！開場時他身穿紅色褸扮吸血殭屍跳唱，期間左手染有紅色液體，起初大家以為是化妝，但原來當時已被飾物割傷手流血！他血照流舞照跳，非常專業，直至嘉賓組合農夫踢爆揭發，並提醒Fans跟林峯握手時要輕力一點。
弗到漏零脂肪
減逾20磅的林峯練得一身結實肌肉，到個唱中段他換上白背心黑褲晒麒麟臂，與多位半裸男舞蹈員跳唱，唱至《Once Again》時更High到扯掉背心，半裸大騷身上彩繪，見他完全零脂肪，六舊腹肌相當明顯，全場Fans嗌到拆天！其後舞台噴水及玩火花效果，但林峯騷肌竟然只有一首歌時間，唱《Chok》時即笠上黑色網衫，略嫌唔夠喉！
其後林峯跟Fans深情傾偈：「咁多年音樂夢想喺晒呢個演唱會，其實第一次開騷已經想爆衫，但冇時間操肌，今次係最辛苦，但最開心！」到個唱尾聲，他深情培白：「現場好多人睇住我大，近兩年我好似少咗啲影視作品，遲啲會陸續多番，都擔心大家係咪唔記得我，但你哋令我有番信心，今次唔知係咪我最後一次演唱會，我比較貪心，想音樂影視各方面都有更多作品。」
粉絲擔心割傷頸
完騷後林峯受訪，他展示左手手掌長達5cm的傷口，笑說：「唱親《Broken》就真係Broken！幾年前又爆，今次畀飾物整親，最驚係啲血滴落地會跣親人，其實見紅都未必係壞事。」其後他自拍晒手掌傷口，留言向粉絲報平安表示會繼續演出。唱片公司方面表示出事的飾物會繼續佩戴，以免影響造型，並笑指林峯是工傷，但冇入院故不用賠償。不過因飾物掛近頸部，不少Fans擔心林峯忘我演出時會再割傷。
此外，擔任嘉賓的農夫放笑彈，笑指林峯開三場騷已減逾20磅，若開十場可能只剩下20磅，又搞笑將騷名翻譯：「叫《林峯心臟病發演唱會》，我哋都要開《農夫尿道炎演唱會》！」他們又指當年林峯拍劇集《回到三國》時認識：「佢做諸葛亮，成日拎住把扇，仲話：『我有扇（有線）o架！』」另外，一直有傳無綫封殺林峯，而完騷後未見無綫派員於後台採訪。
採：音樂組
文：影視組
|
鍾意就快D Share啦！
|
|
|