伍詠薇（伍姑娘）老公練海棠被拍得與34D長髮女約會，還被指車震「偷食」，伍詠薇今日為有線節目錄影，交代事件，期間多次代老公跟大家鞠躬道歉，表現大方得體！
第一反應：嚇一嚇
因要配合傳媒各方要求，伍詠薇就事件作出多次回應，而接受紙媒訪問時，被問到看到偷食短片時的第一個反應，她直言：「嚇一嚇，行出廳再睇清楚條片，消化咗先，我發覺自己幾冷靜，跟住先去叫醒老公，同佢講，喂！醒一醒，睇吓發生乜嘢事？！可能大家會估計，我會大吵大鬧，但我唔會，雖然平時我大癲大肺，但只不過係喺娛樂圈嘅個性，我處理事其實都會比較冷靜，先問咗發生乜嘢事先？奈何，今日要好早出門口，所以，我同佢都只係傾咗個多小時，了解件事嘅一小部份，依家你問我，我只可以答，做完嘢，返屋企閂埋門，了解家事當中。」
認最近冇溝通
伍詠薇直言看到短片第一刻有不開心，她謂：「睇到嗰一吓，會唔開心，但另一方面，我會諗吓自己，我唔會怪晒對方，係咪我疏忽咗家庭生活呢？呢個可能係我天真咁諗，係咪我最近好忙，工作太密集式？因為我啲訪問稿，我會用手打一次，我一抄要兩、三小時，所以夜晚都冇乜同佢溝通，所以，佢可能就曳曳，但應該冇你哋幻想同估計咁多。」
會否離婚：唔係咁容易
伍詠薇又講明回家後會繼續了解事件，問到若發現偷食事件屬實，會否離婚？伍詠薇謂：「唔同年齡，有唔同想法，唔係咁容易，我了解咗一半，重點嘢問咗先大佬，唔會由頭說起，電影都係睇結果，鬼片最終究竟有冇鬼先，知道重點，先放心出嚟做嘢。（信唔信？）我作為家人，我嘅態度係，你哋作為記者，對唔住，或者市民，你哋可以去評論，但唔可以睇我點諗，應點樣去處理，我回家了解件事會再諗。」
唔識34D女：識仲嬲
伍詠薇直言不認識短片中女子，她謂：「最好唔識識仲嬲，話畀你聽，吓，原來係陳敏之，如果係真，會嬲㗎，對唔住陳敏之，我咁話你，原來係袁詠儀，又點算呢？人妻，死喇！（以後花多啲時間陪老公？）可能如果每個人發生事，總有原因，唔會怪晒對方，我都會花時間，如果件事順暢，我都會檢討自己，花多啲時間陪佢多啲，如果佢氹得我歡喜嘅話，都要嘅。」
7月結婚17周年：反佢又點算家人呢？
「今年七月，我哋就踏入第十七年婚姻，個底好強，講真，記者寫一啲說話，幾難聽，我唔介意，一段關係，踏入十七年唔係短嘅時間，作為家人、丈夫，呢一個時候，雖然未了解全部，我都需要支持佢，依家反佢，呢啲又點算係家人呢？所以，多謝大家關心，唔好意思，令大家、粉絲擔心，我代練海棠同大家講聲對不起！」
談老公：佢已有應得報應
會否叫老公出來回應？她謂：「唔會，佢已有應得嘅報應，畀狗仔影到，佢係圈外人，你問佢，佢都唔會答，我亦叫佢無需要向外答，我代佢答，我係好冷靜，只係有小小唔開心，畀啲間時間我去堅強面對。」
「呢個禮拜勁審佢」
問到七月一日會否繼續慶祝結婚周年，伍詠薇說：「年年都有時會搞，同朋友慶祝，今年仲係計劃緊搞唔搞之間，我自己係想二人世界，係咪應該多番啲時間，多啲人，未知，最近工作太密，冇時畀我出來約朋友，唔係話吹雞食飯，可能係低調慶祝，要再諗吓。等我今晚番去小完佢、勁審佢，不過今晚都要繼續做嘢，等我呢個禮拜勁審佢，所以你哋應該見唔到我哋喺街，狗仔隊可以休息！」
唔知會否再畀機會老公：冇嘢係一定
再問會否畀機會老公，她說：「我唔知，我要聽晒故仔先，機會都要畀人嘅，但係聽咗故仔先，冇嘢係一定，有啲保留先。（跪玻璃？）咁又唔使，其實我係一個好SWEET、好明白事理嘅女人，等我平心靜氣聽埋個故仔先，畀機會係畀佢講，唔應該一味單向信晒報道，無論朋友或者丈夫，都要畀機會。（佢有冇認真講對唔住？）佢話唔好意思，出嚟要面對咁多記者，佢食餐飯，我就要出來解答，變咗佢嘅經理人，講咗聲唔好意思，未至於講對唔住，如果講對唔住即係做錯事，所以呢個問題我答得好妙，希望佢唔好同我講對唔住，你去食飯，我出嚟答，所以我要好鎮定好堅強去答問題，好多謝各大記者錫住我。」
「堅持唔學煮飯」
問到是否唔再畀女仔埋老公身，伍詠薇說：「係雙方面，唔係突然有攝石，大家互相檢討吓，唔會因為咁唔畀佢同女仔食飯行街，我依然會畀佢去做，係咪要咁熱情，由自己決定，唔係話呢樣嗰樣唔准咁，每個人有自己嘅生活，不會去改變，最重要尊重珍惜對方。（十七年嚟有冇曳過？）試過畀狗仔捉到，嗰次真係冇嘢，完全係交產品畀嗰位女仔，我知屋企冇飯食，我唔煮飯又唔叫外賣，但我堅持唔會學煮飯。」
「你愈冷靜處理，男人就愈驚」
其實伍詠薇今日就事件多度接受訪問，佢喺另一個場合受訪時，言辭更辛辣，佢話：「個女仔識唔識唔重要，畢竟一隻筷子敲唔響，段片都影到佢出去食飯食得幾開心，好似初戀咁樣，抵佢畀人影到。之後會唔睬佢，打佢屁股，你愈冷靜處理，男人就愈驚。作為一位成熟嘅太太，一位另一半，唔好信晒段片先，雖然係冇得走雞，要承認係真事，但問佢了解吓先，同佢了解晒之後，之後會點處理，就唔會再同記者交代，今次係最後一次公開講。」
暗示真偷食冇彎轉
「今朝真係太短時間，會問咗佢個結局，有冇做嗰啲咩先（作狀吹口哨），同原來有嗰啲嘢，我就真係冇嘢講，我信任我先生做嘢冇大家諗到嘅咁複雜，會問咗佢個結局先，返去再做再審判，今次真係要多謝有人幫我影到佢曳曳，佢唔需要再受罰喇，咁樣被追問已經係懲罰。」
|
鍾意就快D Share啦！
|
|
|
