伍姑娘二月 47歲生日，跟老公開心慶祝。
娛頭
酒吧前奏 伍詠薇老公南灣車廂偷食
現年 47歲的伍詠薇， 99年再婚（第一任老公翁江培），與從事廣告業的練海棠走過十七年婚姻生活，表現恩愛。不過，年過半百的練海棠，近日卻背住老婆偷食 34D屋邨妹；早有準備的他，全程戴口罩又剝衫玩變身，甚至使走司機，自己做柴可夫跟屋邨妹到中環撐枱腳，然後直落車去海灘，玩車廂纏綿兩粒鐘。事後，含春練海棠更落車淋水解渴！真係咁爽！
化整為零
結婚多年的伍詠薇和練海棠，經常將慶祝生日或結婚周年開 P的恩愛相，放微博晒幸福；一四年二人結婚十五周年紀念，伍姑娘更公開大讚另一半亦師亦友亦伴侶，堅信二人風雨同路，可繼續走下去。
只要相信！就算一○年練海棠被發現趁老婆離港偷食長髮女，伍姑娘第一時間出來撲火，力撐老公冇行差踏錯。
「其實老練（練海棠）身邊一直唔缺女，佢以前搞 production house，成日要 cast啲女仔拍廣告做活動，所以大把機會，不過他唔會揚，伍姑娘亦識做，講過如果選擇相信，就唔會查根問底。嗰次俾人影到同個長髮女燭光晚餐，伍姑娘都係同老練講，如果要走，早啲通知，唔想自己係最後一個知道。」知情者說。
去 7仔變身
有個睇得開又大方的老婆，趁伍姑娘近期要拍有線電視真人騷《伍姑娘真識食》，靜極思動的練海棠又再孔雀開屏。近半個月，連續約會相當好肉地的 34D長髮女；而每次出動，練海棠都會戴口罩遮樣，甚至剝衫變身，做足十級戒備。
今個月四日黃昏時分，本刊發現練海棠揸住平日由司機開的七人車到天后，之後跟露腰背心短褲的大胸女來個熱情 goodbye kiss，才開車走人。享受完快餐後，練海棠就到越南餐廳，買了大袋外賣返貝沙灣屋企，同老婆撐枱腳歎常餐。
三日後，下午茶時間，不用上班的練海棠又再相約 D胸女，到唔多人的油麻地百老匯睇戲。只見他一個人去食麥記，食完拎住個紙袋行去附近 7仔，本來著住白色 tee的他，失驚無神著多件恤衫上面，又戴埋口罩同眼鏡，大變身！
使走司機
原來練海棠約好了 D胸女在戲院大堂等再一齊入場；散場時，二人搭𨋢時仍有講有笑，但跟住又好有默契地分開，練海棠再次閃入便利店，除去口罩回復本來面目後，他的司機亦校啱時間，揸定架車等候。
交收完後，練海棠便使走司機，而 D胸女亦在這時出現上車。有女在旁，練海棠又馬上再戴番口罩遮樣。
睇完戲，下一站開飯。由九龍經西隧到中環藝穗會，到停車場泊好車，練海棠便攬住 D胸女去搭𨋢，之後二人一度又扮唔識分頭行，只見 D胸女在藝穗會畫廊慢行了十五分鐘，然後到酒吧先行坐低。
含春扮醉
食飯當然不是主菜！二人叫了意粉同白酒，兩杯落肚，練海棠愈來愈放鬆，坐在 D胸女面前又咬唇又笑到含晒春，對方亦配合有反應，只飲了一杯白酒的她，竟然扮醉到趴响枱，好戲到呢！
爭取時間，食唔夠一粒鐘，七點幾練海棠已叫埋單走人，到停車場攞車駛到藝穗會門口，上車時，醉到趴枱的 D胸女出奇地完全清醒，練海棠隨即開 turbo，直踩入南灣沙灘。
匿車兩粒鐘
泊好位，二人落車由車頭鑽入中座，就算當晚天氣接近三十度高溫，兩人亦一直匿在車廂內兩粒鐘。
其間， D胸女全程冇落車，至於剝去恤衫著住老底的練海棠，則間中落車抖氣飲水，這晚熱辣辣的他，更要用成支礦泉水淋頭降溫。
車價九十萬避震力強的七人車再舒服，但歡樂時光過得特別快！又係時候走人，練海棠返回前座，開車送 D胸女返筲箕灣耀東邨，二人未 say goodbye已難捨難離，女方再次折返前座傾多五分鐘，之後再來個吻別。
有個體貼老婆，偷食更加要識抹嘴！有經驗的練海棠 happy一晚後，先仔細執拾好車廂，才施施然返屋企交人。
撰文、攝影、攝錄：娛樂組
|
鍾意就快D Share啦！
|
|
|
