熱爆娛樂: 直擊諸葛紫岐作法　搵高人救婚姻 [壹週刊

2016年8月11日星期四

直擊諸葛紫岐作法　搵高人救婚姻 [壹週刊 - 1379] __,諸葛,諸葛紫岐,M1,

上月 26日下午，諸葛紫岐一家三口相約陳淑蘭高人契爺、特異功能大師林師傅，在又一城 high tea。

探熱針

直擊諸葛紫岐作法　搵高人救婚姻

結婚四年半，諸葛紫岐與老公 Neway二少薛嘉麟育有一子薛華韜，近年二人屢傳婚變，去年十月，諸葛更抑鬱暴瘦。

床頭打交床尾和，日前本刊發現兩公婆合體湊仔 high tea，其間同場的陳淑蘭契爺、特異功能大師林姓高人，更即場為二人摸頭祈福，救婚姻。

商場祈福

諸葛紫岐由拍拖到結婚初期，一直被二少當正皇太后般服侍，不知葡萄死幾多港女。婚後，諸葛一索得男，令她在夫家的地位，更加如虎添翼，簡直要風得風。不過諸葛嫌悶不甘做全職闊太，竟自立門戶搞娛樂公司生意，做事業型女人，難免冷落老公。

早排傳婚姻開始亮紅燈，但據知二人仍然努力維繫雙方關係。

上月尾，記者發現諸葛偕老公，帶埋囝囝「冰岐麟」薛華韜同外傭到九龍塘又一城 high tea；席上還有一名白髮 uncle，是蘭子陳淑蘭的契爺，人稱林師傅的高人。

下午茶時間，商場人來人往，但見高人異常集中，親手沖泡了一杯熱茶，之後左手攞起茶杯，右手同時按着諸葛頭頂，口中唸唸有詞，諸葛以左手接過熱茶，並立即飲一啖。整個過程有特定步驟，應該不是普通祈福。

高人亦有幫諸葛囝囝「冰岐麟」按頭祈福。

其間高人為諸葛「施法」，一手為她泡茶，一手按着她頭頂，口中唸唸有詞，動作維持了 5分鐘。

諸葛叫高人贈老公薛嘉麟幾句，應該是講中 point，諸葛高舉手指公表示認同。

做完儀式後，高人發覺諸葛啖茶飲得太少，立刻督促她再飲多幾啖。

低調高人

其後，高人又把手按在冰岐麟頭上，為小朋友身體和學業進行祈福。席間，記者見到與薛嘉麟打對面坐的諸葛，一度指着老公向高人請教，只見高人一臉認真，向薛嘉麟講了好一陣子，旁聽的諸葛露出滿意神色，更向高人豎起拇指。似乎是批中夫婦之間問題，能夠點出問題癥結，便有辦法解決。

「林師傅喺行內好出名，有特異功能，娛樂圈中最早識佢嘅就係蘭子，幫佢解決過好多問題，兩個好投緣，佢哋九十年代已經上咗契。不過高人好低調，諸葛係响社交圈度識咗佢，知道對方勁有料到。

「諸葛同老公近年多咗磨擦，又各有各忙，為咗自己同老公，諸葛唔想就咁算，所以試吓搵高人指點囉！睇落好似太迷信，咁都好過乜都唔做。」知情人說。