上週二（ 30/8），做到七點幾收工的活希兒，孖住揸百萬平治的新金龜 Darrin行超市。
探熱針
做唔成孫大倫新抱 元祖𡃁模活希兒變銀行董事
稱得上是元祖𡃁模的活希兒，當年離開娛圈到澳洲讀書，升呢做法律界之花，原本等住入門做中港照相器材集團主席孫大倫新抱，點知埋門一腳撻 Q。
愈跌得低，反彈力愈高！重新出發， 33歲便在投資銀行瑞銀做聯席董事，又釣到金龜 Darrin，好威喎！
月入過十萬
𡃁模熱冷卻，但作為第一代的活希兒，一早攞番書包轉行，醒爆！
「 Fiona响澳洲讀法律，畢業返香港做事務律師，專攻商業文件。但大前年（一三）佢走咗去前度（孫道熙）個婚禮踩場之後，就離開咗律師樓，後來輾轉去咗瑞銀（ UBS）嘅法規事務部。因為上司好欣賞佢，愈撈愈掂，而家做埋聯席董事，月入過十萬。」知情人說。
平日返工，朝八晚七，活希兒淡妝，造型 smart causal的她，下個月就三張四，但並未走樣。
最爆著婚紗踩舊愛場
13年，活希兒踩去舊愛孫道熙（孫大倫幼子）的婚宴，仲要著住跟新娘林珊亭同款婚紗「贈興」，新郎之後在 fb爆 seed，聲明以後唔想再見活希兒兩母女。
事後她解釋當晚著住的「晚裝」是由契媽孫大倫夫人所贈，並要求她著去婚宴，又公開張孫老太本人試裙相。有傳孫老太與活希兒關係好，加上唔 like新抱林珊亭，於是夾計大龍鳳，因而鬧出笑話。
婚宴變鬧劇後，孫老太又戲劇性地拖埋新抱同活希兒去福臨門「飲茶」，「順便」給傳媒影張世紀合照，入唔到豪門的活希兒奉陪到底，好攞命。
避忌拍拖
據了解，生於單親家庭的活希兒一直想有個屬於自己的家，雖然做唔成孫家新抱，但她冇被打沉，還成功釣得才俊男友 Darrin。
上週二（八月三十日）晚七點幾，一臉疲態地離開位於交易廣場寫字樓的活希兒，放工後先到 ifc行超市。過了不久，就見現任男友 Darrin出現，原來一早約好。
雖無做幕前多年，但活希兒警覺性不減，在公眾地方，跟男友保持距離，零親密動作。但睇得出二人甚有默契，在超市先掃了大堆沙律、刺身和壽司，之後再去揀酒，但揀來揀去，活希兒都唔啱心水；轉場去另一店鋪再睇過，終於揀到一支白酒，之後坐住男友過百萬平治離去。
投資有道
活希兒早前出席慈善活動時，亦坦承蜜運中。
「我有男朋友，好甜蜜穩定。（計劃結婚？）未諗到咁遠。（會唔會考慮做番幕前？）唔會啦，做律師啱我多啲，另外仲有搞時裝店生意，有自己嘅品牌同鋪頭。」活希兒說。
事實上，活希兒的朋友圈子個個都非富則貴，旗下的出租衫店「 Chandelier」便是與扶輪社（蘭桂坊）主席李君兒（ Fion）及設計師彭穎怡（ Wendy）合作；至於蒲腳，則是傅明憲、劉晨芝等社交界常客，人脈關係，四通八達。
做投行，活希兒亦投資有道。一○年，她以一千一百萬購入大坑帝后臺豪宅，現已升值至一千七百萬，賬面賺過四成。
佗衰 Hello Kitty成笑話
98年， 15歲的活希兒（ Fiona Braidwood）與陳曉東拍完美國棉牛仔褲廣告，憑住甜美中澳混血靚樣及一雙長腿竄紅，屬元祖級𡃁模；亦先後跟謝霆鋒及陳曉東傳過緋聞，人氣甚盛。
最愛的偶像公仔是 Hello Kitty，卻偏偏「死在」其手上。一心想轉型做歌手的活希兒，主打處女作叫《 Hello Kitty成為朋友》，但一推出便成為世紀膠歌，其中致命歌詞：「成日微笑……共聚伴隨和我一起跳高！」令冇口及個子小的 Hello Kitty成為笑柄，觸發 Hello Kitty忠粉狂轟，指她佗衰可愛偶像。處女碟一出即仆。
活母欠債拖累要引退
出道爆紅的活希兒，一度是多間公司爭相力捧的對象，可惜身邊有個當她係搖錢樹的母親 Bonnie，欠債纍纍，斷送女兒大好前途。
唱片成績慘不忍睹，之後活媽被指欠債，要賣樓套現及跟第二任老公林磊明有錢銀轇轕等負面新聞，最終活希兒決定引退，避去澳洲讀書。
當時跟她簽了兩年唱片合約的張耀榮，亦忍唔住炮轟活母，指她經常從中作梗，又將女兒當王菲級數看待。合約訂明一年出兩張唱片，但因為活希兒遠走澳洲，收晒錢的活母無法履行合約，不過張耀榮並冇追究，還替活希兒不值：「佢阿媽好麻煩，其實活希兒都好慘，任由阿媽擺布。」
撰文、攝影、攝錄：娛樂組
|
鍾意就快D Share啦！
|
|
|
