娛樂偵訊
《點五步》林耀聲窮到日使四蚊 光酥餅當三餐
屋邨仔娛圈追夢，唔止吳業坤。
近日在真人真事作為藍本的熱血電影《點五步》中，憑陽光味彈出的「基界男神」林耀聲，屋邨長大，在娛圈十年，直至今年在 ViuTV劇《瑪嘉烈與大衞》飾演少年林保怡，才嶄露頭角。
為咗個人夢想， 27歲的林耀聲可以去到好盡！ 12年，當所有人都攞住部幾千蚊的智能手機，他每日使四蚊，三餐靠啃光酥餅填肚。
比起做隻棋，日日燒賣當正餐的坤哥，林耀聲更加熱血。
做過地盤裝修
《點五步》故事環繞一班屋邨仔，現實生活中，跟父母同住百呎屯門公屋的主角林耀聲，是活生生的例子。當年十七歲的他，因為靚仔和好腳法，在球場被導演麥曦茵發掘，從此，將一個唔係踢波，就匿埋屋企打機，毫無目標唔知何謂夢想的屋邨仔生命改寫。
雖然處男作《烈日當空》冇令林耀聲一舉成名，但他已立定志向走下去，唔再日日等運到；入行頭四年，為生活打過三十份散工，跟車工人、裝修、侍應、地盤、髮型屋、壽司店學徒等等，稱得上娛圈散工王。
「因為冇一份工，可以容許你成日請假去拍戲，所以惟有撈散，有戲開就辭工。屋企人都有詐型，話唔明我點解唔搵份正常工做，但對於我嚟講，搵到錢唔等於成功。」林耀聲說。
學校門口賣唱被趕
回到一二年，當食個常餐都要廿八蚊的日子，林耀聲每日只可以用四蚊。
「係就做全職演員，但冇乜收入，全副身家可以得百幾蚊。當時我喺屋企附近搵到份跟車散工，每日行路返工，用四蚊去街市買個光酥餅當三餐。（點解係餅？）貪佢夠大塊囉，食完飲埋水好飽肚。
「跟車同事見我咁，都有主動請我食過幾餐飯，一直頂到出第一個月糧，先唔使再食光酥餅當飯。屋企人唔知，因為我冇錢俾家用，唔夠膽問屋企人攞錢。其實都有問過自己，點解要咁辛苦，想過放棄；不過一諗到如果放棄，就要推翻晒之前嘅堅持，咁就更加唔抵。」
死心不息的林耀聲幾年前曾與公司幾個男仔組隊為 PlayTime唱歌，四個人一齊住在麥曦茵出錢租的 studio。
「我哋試過喺網上籌出碟經費，四個人走去學校門口唱歌派宣傳單張，希望俾人知道我哋係一隊有夢想嘅組合，當然，俾人趕走呢類情況經常發生啦。」
捱吓捱吓就十年，過幾年就三張的林耀聲，儲埋啖火，終於等到機會爆
仙氣逼人
除林耀聲彈出，《點五步》女配角，飾演屋邨女神的 20歲王思敏（ Sadie）亦好養眼。三年前她考完 DSE，在校外被邀試鏡，在處女作《點五步》仙氣逼人。家境曾是中上的她，經歷爸爸生意失敗後，一家屈住百呎唐樓，家庭巨變反而造就 Sadie的感情演繹。
撰文、攝影、攝錄：娛樂組
場地提供：食民營/ ISLAND CAFE
|
鍾意就快D Share啦！
|
|
|
