熱爆娛樂: 沖繩甜蜜蜜　離婚兩年　嫩妻變靚　吳啟華𢱑掂石洋子復合 [壹週刊

2016年9月29日星期四

沖繩甜蜜蜜　離婚兩年　嫩妻變靚　吳啟華𢱑掂石洋子復合 [壹週刊 - 1386] 石洋子,吳啟華,M1,

娛頭

沖繩甜蜜蜜　離婚兩年　嫩妻變靚　吳啟華𢱑掂石洋子復合

52歲的吳啟華 07年娶了比自己細 21年的內地女藝人石洋子，二人育有一女，但結婚未夠三年便鬧分居， 14年更正式宣布離婚。

有指被動的吳啟華一直放不下這位嫩妻，為了麻醉自己，有一段時間更沉迷賭海；直至三個月前，他終於的起心肝，重新追求樣子愈變愈靚的前妻石洋子。

兩星期前，吳啟華帶住石洋子去了日本沖繩度假，兩人翻撻成功。

兩燈膽同行

一四年，吳啟華公開宣布與細廿一年的石洋子離婚後，便再沒有跟其他異性傳出過戀情。有指當年兩人因為文化、性格差異，加上只得廿幾歲的石洋子根本未定性，即使已為人母，依然堅持離婚；嫩妻求去，吳啟華全程被動。

但想不到，事隔兩年，二人關係峰迴路轉。據了解，吳啟華同石洋子已經秘密復合三個月，早兩星期，二人更一齊去了日本沖繩度假，雖然還有因為拍大台劇《隱世者們》而熟絡的趙碩之及周美欣同行，但吳啟華卻不受電燈膽影響，同石洋子復合甜蜜蜜。

旅程九月十日出發，一共五日四夜。由於近年吳啟華迷上踩單車，所以行程中亦有安排「單車自駕遊」。

對於復合一事，二人均採取謹慎態度，整個旅程，石洋子只將少量風景相貼上微博，並未有交代與誰同行和外遊地點，而吳啟華更加沒有洩露半句行蹤。

兩人身貼身一齊揀魚生。

吳啟華全程對石洋子服侍周到，用行動感動女方。

吳啟華同石洋子食魚生撐枱腳，其間石洋子不時含情脈脈望住對方。

「老婆」愈變愈靚，個樣愈來愈後生，難怪吳啟華對佢一條心要翻兜。

突然間趙碩之同周美欣走來搭枱，破壞他們二人世界。

石洋子連影合照都要戴住口罩，刻意低調唔想俾人知同吳啟華去旅行，大合照都唔係張張有份影。

石洋子在微博都有放了幾張旅行風景相，但沒有透露去邊，以及同邊個去。

一條龍服侍

偏偏同行的趙碩之和周美欣，除了將大量旅行相放上 ig，更經常提住吳啟華，只差在未有將與石洋子一齊旅行的事實，公諸於世。不過，石洋子都十分警覺，有吳啟華份的大合照，都一定戴口罩，惟有一千零一張相，是清晰見到樣。

回程當日（十五日），一行人離開沖繩前先到魚市場食晏。現場所見，吳啟華對石洋子服侍周到，兩人孖咇走埋攤檔揀魚生，揀完就叫石洋子先返埋位坐等食，吳啟華由等到上枱再夾埋俾「老婆」，一條龍服務。

對前夫的殷勤，石洋子十分受落，一路食，一路含春樣望住吳啟華，直至兩個電燈膽趙碩之同周美欣殺到，二人才收起眉來眼去，食完就一齊起程到機場返香港。

15/9

沖繩返港後，吳啟華同石洋子又突然扮生疏，永遠保持八個身位距離。

同車返九龍塘

返到香港，吳啟華和石洋子又突然扮生疏，雖然一同出閘，但雙方長期保持多個身位距離，只見負責推住兩個人的行李的吳啟華，不時擰轉頭，留意兩手 fing fing的石洋子是否跟得上。

直至去到的士站，二人終於黐番埋，吳啟華照例叫石洋子先上車，自己就做咕喱搬行李上車尾箱，之後一齊返回九龍塘寓所。

去到的士站，佢哋終於行番埋一齊，石洋子極速上車，吳啟華負責搬行李。

自己等行李

享受完沖繩復合之旅，石洋子便返回內地，冇人看住，但吳啟華好守規矩，自己一個人去睇戲，又或者約陶大宇、蘇永康一班兄弟去食飯，只有一日去了尖東港晶中心一間桑拿中心揼骨兩個鐘。

「 Lawrence（吳啟華）自從氹番掂老婆之後，真係乖咗好多，連澳門都去少咗！佢之前心情唔好先成日賭錢，依家唔使其實 Lawrence好鍾意石洋子，嗰陣老婆話要分開，佢都好努力去掹，希望大家唔使行到離婚呢步，但石洋子企硬，佢都冇辦法唔妥協。」吳啟華身邊人說。