下月便42歲嘅98年港姐季軍吳忻熹（前名吳文忻），五年前嫁畀有「南丫島王子」之稱嘅金融才俊陳劍陵，兩年前仲生咗囡囡陳芊彤（Scarlet），佢一直有意再生多個，諗住兩個夠晒數。呢個家庭計劃終於實現，吳忻熹近日真係低調造人成功，陀B六個月，腹大便便，吳忻熹雖然有update佢facebook，但好少貼全身相，即使po相都係自拍大頭同半身，又或囡囡相，所以再大肚消息一直冚得好密，不過日前有佢嘅閨密唔覺意貼咗同吳忻熹high tea相，相中見佢個肚好大兼谷奶，成個人脹咗一個碼，洩露咗吳忻熹再度懷孕陀B。吳忻熹上月湊女返幼稚園時，佢着住短褲時都見身形圓潤咗唔少，以為只係心廣體胖，點知其實已有BB，不過佢仲好活躍，唔單止日日湊女，上周仲約埋班friend睇鄭秀文演唱會，因為有咗第一次陀女經驗，佢當然知晒禁忌，好好享受十月懷胎。已有一女嘅吳忻熹，一直恨再追B為囡囡做伴，終於如願以償，以佢o依家6個月身孕計，預產期估計係明年2月，農曆新年後。《蘋果》今日打畀吳忻熹，恭喜佢將做第二任媽咪，佢話：「多謝多謝，收到好多朋友嘅祝福。」到底佢呢胎係陀仔定陀女？吳忻熹大賣關子：「大家估吓，到時先揭盅。」吳忻熹仲話呢胎係送畀囡囡嘅禮物，希望佢成長有伴，佢生埋呢胎都封肚。吳忻熹婚後即淡出幕前，專心相夫教女，以家庭為重，佢好享受湊女生活，平日都必定親自送囡囡返幼稚園，再生多一胎，佢肯定有排忙。
|
鍾意就快D Share啦！
|
|
|