52歲練馬師澳洲籍賀賢早前向女友28歲、09年港姐亞軍李姿敏(同屆冠軍係劉倩婷，季軍係熊穎詩
)求婚成功，兩人計劃下年拉埋天窗。女方日前報喜時笑道:「我同David(賀賢)已訂咗婚，計劃下年結婚。David一直好專注練馬工作，所以之前冇高調公佈我哋嘅婚訊。」賀賢就話最欣賞未婚妻開朗樂觀嘅性格，係一個Happy Girl，帶俾佢無窮正能量。李姿敏父母係馬主，以前養過隻團體馬「飛銀動力」，該駒2011年贏過香港三級賽港澳盃。但佢同賀賢撻着嘅地方，竟然係馬會會所健身室。噚晚李姿敏手上戴住閃閃訂婚鑽戒，到尖沙嘴1881出席微笑行動慈善籌款活動開幕禮。問李姿敏婚事籌備成點？佢竟然爆咗句「心大心細」——仲未諗掂嫁唔嫁？唔係，係未諗掂喺邊度結婚。李姿敏尷尬笑道:「係三心兩意，唔係心大心細。未定日子，自己三心兩意，又想澳洲又想峇里搞沙灘婚宴，最想係搞個露天婚宴，然後返香港擺酒。」李姿敏透露未婚夫係喺日本旅行時求婚，令她感動落淚。至於鑽戒，李姿敏稱:「唔在幾卡，只在乎質素。」同老公年齡相距24載，李姿敏就話:「初時爸爸媽媽都好抗拒，後來我哋相處落好好，好舒服，我哋之前一齊，後來分開咗兩年，再一齊好珍惜大家。我哋計劃生小朋友，而且想保持性別神秘，到生育時先揭曉。」
| 攝影：沈健程 | | |
| | | |
來源 source: http://hk.apple.nextmedia.com
|
鍾意就快D Share啦！
|
|
|