林穎彤六金齊發等買磚王敏德交8,000萬家用
本月13日攪珠的「中秋金多寶」哄動全城，預計頭獎彩金高達8,000萬元，除了打工一族外，圈中藝人亦絕不放過發達機會！王敏德為了做機師豪花300萬，被太太馬詩慧指他「敗家」，他豪言若中頭獎，絕不會「敗家」買直升機，反而會乖乖將全數獎金交給太太；至於憑《城寨英雄》「鑫鑫」一角彈起的林穎彤在單親家庭成長，她揚言若獨得8,000萬獎金會先買樓為媽媽添置安樂窩，認真乖女！
港姐麥明詩、林峯、李克勤及洪永城亦有所盤算，未派彩先興奮！
林穎彤
近幾期(3)、(6)、(9)係當旺號碼，我會買(3)同(6)，因為我個角色名係「鑫鑫」，各有三個金，夾埋就係六個金，而我係第七集死，所以我會買埋(7)！如果咁幸運中頭獎，我會買樓畀媽媽安居樂業，同埋會帶佢去旅行。我仲會捐畀慈善機構，特別係幫小朋友，因為我細個都得到大家嘅幫忙！
王敏德
如果中咗頭獎，我唔會買直升機，會畀晒啲錢老婆，將中獎獎券交畀佢處理！我嘅心水號碼係(5)、(10)同(21)，呢三個都係我o既Lucky numbers，大家同我一齊買，一齊贏！
李克勤
買六合彩呢啲嘢梗係要大班朋友一齊買啦，如果唔覺意中咗咪大家一齊去旅行囉！最緊要「圍威喂」，大家Happy嘛！至於號碼梗係出電腦飛啦，簡單、直接，中咗又唔使拗，幾好呀！
麥明詩
我嘅心水號碼係(13)、(14)，我鍾意逆向思維，呢兩個號碼喺中、西方係不幸運號碼，有時唔幸運反而先係最幸運。如果真係中咗，我會畀錢請名師教我演技，因為呢排拍戲發現有好多嘢未夠好，所以要進修，進修完就開套戲畀自己拍！
洪永城
我唔信當旺號碼，我信自己！我嘅幸運號碼係(12)、(23)，因為12月係我生日，如果中獎會請晒全家去旅行，當然包埋唐詩詠剩低嘅錢就用嚟錢搵錢！
林峯
我以往都係同朋友夾份買六合彩，連投注站都未去過。今次買嘅話，我會揀生日號碼(10)、(8)，幸運數字(4)、(14)，同埋好意頭嘅(18)、(38)。如果一注獨中，我會將部分獎金捐出做慈善，因為呢啲係橫財，應該同人分享好運！
|
鍾意就快D Share啦！
|
|
|
