前港姐張名雅今日與律師另一半Joe（蔡錦豪）在尖沙咀洲際酒店舉行婚禮，筵開40席。一對新人約於下午五時與兄弟姊妹會見傳媒，名雅戴上三卡求婚戒指及約七位數字珠寶，並與老公即場化身「接吻魚」，前後錫足七次，有長吻有短吻。名雅更細心幫老公抹去嘴上的唇印！而盛傳有喜的名雅腹部微隆，拍照時又不時以手遮肚；不過現場所見，她卻穿了至少五吋高跟鞋，非常貪靚！
名雅與老公齊齊受訪，名雅先多謝朋友及Fans送上祝福，她直言心情非常開心，講到今晨接新娘，她說：「我喺房度，但何佩珉好好幫我拍片！（叫姊妹錫住老公？）都有，但點都要玩，都幾開心！」在旁的Joe即笑言：「都係玩兄弟。」名雅又表示：「有個難關係考番我哋以前啲嘢，我都要諗好耐，以為考到佢，點知佢識答，我冇提佢㗎！（依家係咪有BB？）呢啲交畀老公。（即係係咪有喜？）今日係開心結婚。（未講得？）唔講喇！總之今日大家恭喜我新婚快樂（今日你仲着高跟鞋喎！）係呀！所以都要扶實老公。」
唔肯講求婚過程
問到婚禮的特別安排，Joe表示以溫馨為主，問有否驚喜送給老婆，他說：「有，但唔話得畀大家聽，講咗就唔驚喜。」問到相識經過及求婚過程，他們都不願多談，名雅說：「總之識咗一段時間，唔係一識就拍拖，係了解過，我哋思想傳統，啱先一齊。（拍咗幾耐拖？）唔講喇！畀啲空間我。」
反激土豪負評：都係跟傳統
提到今晨名雅出動超誇張金器拍照，她笑言有30幾對金鈪：「長輩好錫我哋，對我哋好好，有送金鈪，我哋都傳統，有戴金豬。」Joe表示自己親戚較多，並謂感激眾人厚愛；對於被網友指感覺土豪，名雅表示只是跟傳統習俗，並說：「要戴金着褂，我今晚仲要戴上身，條頸好重，仲要戴豬牌。（父母送咩？）都係金同鑽石耳環、紅色篋畀我帶去男家。」問到Joe愛的宣言，他說：「都係擺心入面。（你點求婚？）呢啲咁浪漫唔講喇！」
名雅表示婚後會返溫哥華跟父親當地親戚食飯，約逗留個多星期，度蜜月地點則尚未決定。問到婚後想生多少個小朋友？Joe笑說：「未有計劃，我哋都鍾意小朋友。」名雅說：「大家要夾吓，幾多個都ok，父母冇畀壓力，有小朋友就開心，佢哋會幫手湊。」
講到搶花球，名雅表示留待晚上才進行，並笑言一眾姊妹已蠢蠢欲動：「相信佢哋會衝出嚟，個個都好踴躍，係咁話個花球好靚。」而現場所見，張名雅手上花球嶔有水晶，認真貴氣。
|
鍾意就快D Share啦！
|
|
|
