今屆立法會選舉多名泛民主派老將落敗，包括轉戰新界西直選的民協超級議員馮檢基(阿基)、分別在香港島及新界西角逐連任的工黨何秀蘭(Cyd)及李卓人(阿人)。對於敗選，他們就藉口多多，特別是阿基，一時話新界西票王朱凱廸吸晒票源，一時又話如果自己再出戰九龍西直選就會被人鬧，所以先轉區參選。其實阿基空降新界西才是分薄其他泛民候選人的票源，真係落敗仲要賴地硬！
阿基今日(17日)在電台節目被問到落敗原因，他指民協在新界西有支部，加上他估計自己知名度高，上屆選舉民主黨加公民黨都攞到14萬票，所以就覺得泛民可以攞多一個議席。不過，因為分票分得差，支持泛民的選民又覺得一定唔可以畀建制派候選人入議會，要保送多一個非建制派，結果就投咗畀啲後生仔。以九龍西深水埗為老巢嘅阿基又話，如果今次喺九龍西出選會被人鬧，所以先至轉區參選。不過，阿基轉區分薄泛民票源，都係一樣被人鬧
至於Cyd，她指自己敗選是因為過去主要做議會文件、政策研究、同志工作，多過去同街坊接觸，而選舉期間她並非推薦名單會「比較弊」，加上又有消息傳她停止選舉工程及輸梗，呢啲都會有影響。她仲反問，大家一直想香港島搵多兩個泛民入議會，「但搵嘅時候係睇數量定質量呢？」估唔到她工作「離地」而敗選，竟然唔反省，反而暗踩選民只重數量而唔睇質素，相信冇投票畀佢嘅選民，肯定覺得自己嘅投票決定非常正確。
而自稱1995年至今任職議員20年嘅阿人，今次都被連根拔起。雖然阿人承認自己做得唔夠好，要反思，但轉頭又話現時配票已經蓋過候選人嘅往績同立場嘅考慮，佢擺太多時間喺佔領行動等政治運動中，少咗時間放喺選區。如果好似佢咁講，主打政治議員嘅香港眾志候任立法會議員羅冠聰、熱血公民鄭松泰等人就唔會跑出一班泛民老將多年來靠食老本，選民早已厭棄，依家仲喺度賴呢樣賴嗰樣，睇嚟佢哋真係唔知個醜字點寫。
※更多政經猛料、秘聞，請關注政Whats噏fb：
https://goo.gl/ndFQNz
|
鍾意就快D Share啦！
|
|
|