熱爆娛樂: 胡官住過三千呎「特首府」 [壹週刊 - 1391

2016年11月3日星期四

胡官住過三千呎「特首府」 [壹週刊 - 1391 - 財經] __,特首,M1,

胡官今年三月把手頭持有的堅尼地道萬東大廈一單位出售，獲利二百萬，現時手頭並無物業。（鄒潔珊攝）

中環人語

胡官住過三千呎「特首府」

搶先出閘參選特首的胡官，自爆與時下年輕人一樣，冇磚頭揸手，但提起當上訴庭法官時，住過半山嘉慧園則特別興奮，「係呀，我住嘉慧園 penthouse添，三千幾呎，係我做法官時政府租俾我住。」

嘉慧園風水好都有跡可尋，據聞從山頂落嚟有兩條山坑水，恍如兩條龍脈環抱嘉慧園，前特首董建華當年都寧願住番喺嘉慧園也不願搬到「禮賓府」，從此這個半山豪宅有「特首府」之稱，以往租客大多是跨國企業東南亞行政人員的宿舍，甚或外國領事官邸，甚有貴氣，難怪胡官如此緬懷，貴為港英時期的精英，又喺英國浸過鹹水，想喺港島區住番有港英嗰朕除嘅豪宅真係唔易。現時胡官租住上水金錢村的豪宅——御林皇府，鄰近馬會雙魚河會所，盼能延續「馬照跑，舞照跳」的日子。

位於馬己仙峽道的嘉慧園，單是露台已有一百五十呎，胡官曾入住的複式單位，有三千七百呎。（鄭樹清攝）

不少老牌家族持有嘉慧園不願出售，只肯出租，認為風水好，其中有條山坑水由山頂流落，恍如一條龍脈。（鄭樹清攝）

胡官現租住上水御林皇府，由信和發展，前身是祈德尊爵士別墅；他是港英時期政商界重量級人物，曾任和記洋行主席。（郭永強攝）

佐治哥半島食　 mum mum

唔好以為「上海仔」先會去半島歎茶，經常在上環中遠大廈出入的金融猛人佐治（ George）洪，都會過海去半島的高級餐廳 Gaddi's歎番個 lunch，半島有自家的 Chocolate Room，甜品特別 sweet，睇佐治哥就知，身邊有位後生女陪住食仲好細心，親手餵佐治哥食 mum mum，怪不得有小記曾經問佐治哥攞手提電話方便聯繫，佢話：「唔好啦，有女人打電話嚟，老婆鬧。」真係搵鬼信咩！

結好控股（ 64）老闆洪漢文，坐在餐廳一個角落，享受二人午餐，女性友人餵到埋口，真係 sweet過半島自家 Chocolate Room製的甜品。

中環寸嘴　仲莎士髀罅，攞把刀去劈啦

呢個鬍鬚曾喺個網誌度講，喺美國俾人侮辱時打過唔少交，唉，畢業後喺外國發展有一定難度，總遇過被歧視啦，尤其喺東岸。跟住又去新光戲院，唔係紐約 Broadway，睇廣東話版嘅莎士「髀罅」，唔好意思我呢啲係上環南北行口音，如有冒犯，實屬有心。計我話鬍鬚曾喺度 to be or not to be，唔好好似返母校喇沙教師弟花劍，喺度扮君子劍，須知道如果要出嚟選特首，就要用軍刀劈啲豺狼虎豹，阿習同鬍鬚曾都握咗手，董建華都係咁嘅形式，呢啲唔叫 blessing，乜嘢係 blessing呀？唔通等 employment letter到呀？

啲食肆久唔久要去 update吓，如果唔係都唔知有乜變化，不過我「籮柚」得一個，踎得幾多間吖，我有班老友鍾情制服團體的誘惑，週日俾面派對去大球場睇童軍大會操，順便去「名廚」食個晏，老實講平日就唔會去㗎，去嗰度純粹係「玲姐」個人魅力同埋背後娛樂界嘅老闆，整番個「三十二頭吉品伴東江菜飯」先，家陣做推廣喎，四百三十八蚊一客，話晒係乾鮑實際啲，又用古老銅器上枱，鎮店之寶檸檬叉燒酥都有啲味道，手快有手慢冇，隔籬枱許冠文一家想食都已經賣晒咯！

鬍鬚曾唔好扮君子劍

呢款吉品鮑東江菜飯，$438，話晒係乾鮑，實際過新斗記嘅鮑魚粥。

楊國佳

工廈大王楊耀松長子，八十年代往北美洲開山劈石，做一帶一路先頭部隊，自比為星仔變星爺前冇人懂欣賞其無厘頭文化，廿年後終於領略當中奧妙，與粉絲分享在北美洲各路人士交手經歷，絕不老點。

金融古惑　借中華英雄吸水

呢排漫畫家馬榮成的《中華英雄》被搬上舞台，引發金融古惑仔度橋食大茶飯，有經紀向闊佬推銷一隻人民幣債券，以馬榮成的前「老闆」、漫畫界教父黃玉郎作招牌，並聲稱由央視做擔保，年息有十五釐，一手為人仔一千萬，合共集資四億銀，雖然低息環境，擺錢喺銀行冇肉食，但如此高息作招徠，似乎 too good to be true。當事人黃玉郎謂：「冇咁嘅事，要幫我澄清呀！」其實黃玉郎在股壇上見盡風浪，其玉郎集團在八七股災後易手不特止，還因訛騙公司三千多萬而鎯鐺入獄，所以話此等金融古惑，連搭棚嘅道具都唔肯花心思，都幾難有水魚上釣。