娛頭
上海搞掂 收服花心四太仔 有米 CoCo當何猷君係狗
賭王三、四房幾個仔，個個廿歲出頭，均是城中超級鑽石盤，當中讀書叻又靚仔的四太仔何猷君，更加是少女至愛。去年尾同新加坡變樣孖妹 Yumi分手後，今年初已極速搭上新加坡富二代 Kimmy，隔咗幾個月，身邊又換上混血新歡。
上畫落畫速度快過搭火箭，何猷君最近又換畫。新歡是先後同過周志文、向佐拍拖的有米𡃁模 CoCo袁紫僑（前名袁聖殷）。猷君廿四孝陪 shopping又山長水遠走去迪士尼買氣球接女友機，被當成公主的 CoCo亢奮到在網上暱稱男友做「我的狗」，意氣風發。
一撻即着
年僅二十一歲破紀錄成為最年輕考入美國麻省理工（ MIT）金融碩士課程的何猷君，讀書叻爆，屋企有錢又靚仔，絕對是「人生勝利組」典範。
各種條件俱佳，戀情方面，自然精彩！拍拖經驗豐富的猷君，今年中先同混血女打得火熱，但轉個頭，身邊人已經換上有米𡃁模 CoCo袁紫僑。
據了解，二人是上海一個朋友聚會中認識，向來冧仔冇手軟的 CoCo，兩三下招數已經將花弗何猷君收服裙下。
「 CoCo好識冧仔，睇中嘅 target，基本上都走唔出佢五指山；加上 CoCo自己屋企都有錢，身邊好多朋友都係富二代，同 Mario（何猷君）有好多共同朋友，早排 CoCo喺上海拍劇，就响朋友活動識咗 Mario。第一次見面， Mario已經俾 CoCo電到暈得一陣陣，兩個一拍即合， Mario好快就帶埋 CoCo去自己啲 friend嘅 gathering！」知情者說。
當街調情
上星期日（十月二十三日），猷君又做跟得男友，陪實 CoCo行太古廣場 shopping，見 CoCo在頭飾店試戴頭箍不停對鏡做出可愛表情，猷君情不自禁，幾度輕撫女友秀髮， sweet爆！
CoCo揀頭飾揀足半粒鐘，猷君全程沒有半點不耐煩，一直在旁守候，俾錢期間，二人又唔避忌當住店員面前貼頭攬腰咬耳仔， CoCo更主動捉住猷君的手臂狂掃，搞到猷君㷫烚烚，伸手入女友衫內，在腰間摸來摸去。
花式冧女招
拍拖短短兩個月， CoCo已經公然在 IG放閃宣示主權，除了晒二人孖住去 party的相片外，又開心 share男友送的心思禮物， CoCo更形容自己同猷君是「童話故事入邊嘅公主同小王子，從此快樂生活在一起」，對俯首稱臣的猷君，她會過度興奮地稱男友係自己隻狗。
「 CoCo唔知俾咗啲咩迷藥 Mario食，搞到佢貼貼服服！猷君會花好多心思氹 CoCo，例如專登撲去迪士尼買一大束氣球去接女友機，搞到 CoCo鬼咁開心！」知情者說。
疑神疑鬼
現為組合「少女標本」成員的袁紫僑 CoCo，生得省鏡，家底亦唔錯。因為曾經同巨聲周志文拍拖而為人熟悉，不過大孖花心，竟背住女友偷嗒馬賽同其他女仔，俾 CoCo發現後二人分手收場。
之後， CoCo同向華強大仔向佐拍拖，但同樣因為男方花心而分手。
「 CoCo成日同身邊啲 friend訴苦，話自己簡直係悲劇女主角，啲男朋友都係衰偷食，好似向佐咁， CoCo以為對方一心一意，點知原來仲有個大陸女星王秋紫！其實今次同猷君拍拖， CoCo都成日疑神疑鬼，對男友 check到實。」知情者說。
一個接一個
年僅 21歲的四太仔何猷君，讀書叻又有家底，被封富二代極筍盤，有優勢，身邊從不缺女，一個去，一個來，從無冷場。
初戀 Francesca
12年，猷君第一次拍拖，在英國戀上西班牙、中國加威爾斯混血兒 Francesca，他公開讚女友又靚又叻，精通英文、法文、德文、西班牙及菲律賓語多國語言，二人關係維持了兩年幾。
By2細孖 Yumi
14年搭上新加坡女子組合 By2成員白瑋玲（ Yumi），二人於美國進修短期課程認識並發展姊弟戀，猷君對 Yumi情有獨鍾，即使女方被指是再造人及多次向傳媒放料，他依然不離不棄，更一度傳出婚訊。
富二代 Kimmy
今年初，與新加坡富商，西甲華倫西亞班主林榮福大女 Kimmy Lim撻着，二人愛得高調，澳門、新加坡兩地密密見，又經常於 ig貼出親密照放閃，猷君更發表肉麻宣言，封女友為「 Princess Kimmy」，但王子同公主短短四個月就散。
混血女
今年 6月，猷君被拍到拖住新歡混血女行超市掃零食，其間又攬又錫，猷君更扮鬼臉氹女友，旁若無人。
命中注定
家住貝沙灣的有米𡃁模袁紫僑，有樣有身材，但身邊男伴個個都一腳踏兩船，命中注定與花心男有緣。
周志文
12年，被爆與《巨聲幫》大孖周志文拍拖，衣食住行由 CoCo包辦，其後有傳馬賽介入，又暗暗搭上姣花蔡思貝， CoCo最終決定斬纜。去年，有傳周志文因為經濟問題，搵機會想同前度復合。
撰文、攝影、攝錄：娛樂組
|
鍾意就快D Share啦！
|
|
|