豪語錄
好好睇睇 黎燕珊
拍照時，她說右臉較靚：「一樣嘢跟咗自己五十幾，梗清楚哪方面好睇。」黎燕珊果然好好睇睇，並非例牌對號入座凍齡魔女，是指裡裡外外。
亞姐勝在有黎燕珊，尤其成為歷史後，歷史簡化於興亡，作為開拓她不失禮，來到末代——你未必記得誰是末代冠軍，甚至亞視執笠時有什麼藝員，卻永遠記得黎燕珊像守護神般，為不太光彩的「亞洲史」補上光彩筆觸，在一頭，和一尾。
如果說佳麗們的高貴來自大紅大紫或婚姻美滿，黎燕珊兩樣都欠奉，靠的是莊敬自強。
「直到今天，我連過馬路都好小心。」際遇事與願違，家庭可以破碎，正如敝刊搭出來的「家景」很易穿崩絆腳；但人，至少有權唔行差踏錯，善始善終。
比港姐更亞姐
八五年，黎燕珊身為邵氏演員參選亞洲小姐。「我有方姐（方逸華）親筆的許可書。你問『咁都得』？六叔和邱生根本是好朋友。」當年亞視火災，無綫第一時間支援，前輩風度，並非現時惡性競爭可比。
「條件也是吸引的，提名人告訴我，比港姐獎金獎品更豐富。」她倒老實。早年亞姐特色，直接講，係猶有過之。亞視拍《成吉思汗》，起用首屆冠軍當女主角；無綫死跟以港姐謝寧鬧雙胞。如果還嫌 Miss Asia多北地胭脂，黎燕珊 made in Hong Kong，謝寧才是大陸人。時代開了個玩笑。
發展下來， TVB畢竟強勢，亞姐的出路變得千奇百怪，黎燕珊說：「你指三級片？真係冇人斟過我喎；夜總會中國城倒出價十二萬一晚登台，諗番都覺得推咗笨。《 Playboy》中文版已找我影封面，根叔（邱德根）保護得我好好。我沒先例可循，只知第一屆要做好榜樣。
「亞姐應不應過檔碰機會？在我也沒先例可循。要澄清的是，亞視人工算高，而且掣肘較少囉。」
她為舊東家說了良心話。歷史歌頌勝利者，已滅亡的朝代總任由鞭撻，其實頗長時期 ATV善待員工，這是很多亞視人故意忽略的。
比第三者更次要
係，風物長宜放眼量，但人們同時目光狹隘，衡量佳麗成就變成衡量其夫家，這方面黎燕珊輸晒。
九二年，她與劉永（正如那位成吉思汗）結婚，八年後仳離，黎燕珊申請禁制丈夫接觸子女，卻口不出惡言。
「我幸福過，雖然幸福時間短，短到有時都忘記自己結過婚。保持優雅很簡單，就是不想仔女難堪。如果彼此信仰一致，分開也有偈傾的，但當時我未信耶穌。」
她電影代表作《喜寶》（亦舒小說改編），講述多才多藝女子受富豪照顧。「若只欠一個機會，可以理解，但我容不下第四角色。」
第四角色？原來黎燕珊腦海只有一家三口（一女一子），遑論做第三者了。
「我雖然年紀不老""」其實樂於自嘲，否則不會把五十二歲說成「五十幾年」：「我屬於舊式人，邱生過世了，我陪邱太出席活動都唔失禮，邱太讚我自己打出一片天。
「我也愛靚嘢貴嘢，都買給仔女。自己的，有贊助，靚完還給人便好；幾貴的東西，買下來，不外一樣俾人睇啫，又要搵地方擺，第二次再穿戴仲笑你舊嘢呀！」她揚着珠寶笑。
比慧妍更清敘
相對慧妍雅集，亞姐叫仁美清敍——金庸題名的（所以說曾經旗鼓相當）。港姐有闊太朱玲玲精神領袖，黎燕珊則憑自力更生。主權更替，仁美清敍一度停辦，○九年復辟，獨立於亞視成為純粹慈善機構，真夠清。會長人選，論富貴有利智（二代目），但李連杰夫人潛水，反過來部分自慚形穢亦不願參加，黎大師姐都一一親力邀請。「有些聯絡電話仲係七個字號碼。」辛苦了。
仁美清敍毋寧仁至義盡，在亞視末期乏善足陳下，她們送佛送到「西」。當時黎燕珊早已替有線電視主持節目——別怪她變節，她要拼演出拼生活。
才半年前結業，感覺像上世紀。最後的日子，曾任和現任者一律歸類為亞視人，幾乎清一色發言謾罵、嘲諷。愛之深責之切固然有道理，但黎燕珊的優雅更加硬道理。
「正如婚姻，它帶給過我幸福，弄成散局大家要負責任，抽水都唔係咁抽啦。就算鋪路過無綫，人家都怕咗你將來又把口唔收。」
比貪慕更虛榮
在有線，她主持《情書》再來教育節目，兩件事係一件事，子女是最好的情人。
「我連過馬路都好小心，念及孩子已經沒爸爸，不能冇埋媽媽。現在小兒子都上大學，負擔輕了，他們會反過來拖我過馬路。」
並非隨口問問星二代入行，黎燕珊女兒靠漂亮繼承衣鉢，卻當上空姐——空姐通常係乜姐物姐的前奏吧？「我當然和她講過這行的好處，就是上面提及，不貪慕虛榮也有靚衫。」
壞處呢？「就是作為公眾人物，什麼行差踏錯都會被放大。」
這時，真正值得貪慕，是好好睇睇的榮耀。
Asian
感同身受了。
紙媒、雜誌也像亞視，風雨飄搖，在職者會埋怨，離職者會放冷箭，渾忘卻一樣要面對觀眾，觀眾寧願你好好睇睇。傾國佳人，愈傾頹，愈需要卿本佳人。
婚姻如是，家國如是。不再要求殉愛殉國；至少……你不怕影衰華人，但「支那」會影衰晒亞洲。
亞洲小姐名銜原來甚具先見之明，不是作大的。
撰文：余家強
攝影：黃志明
攝錄：葉志明
髮型、化妝： Michelle Ho
服裝： Phase Eight
|
鍾意就快D Share啦！
|
|
|