探熱針
豪俾迪士尼 城城出動私伙林寶
女鍾意儲飾品玩具名牌包包，仔不外是模型，但富貴如郭富城，愛車如命，架架大玩具貴過層樓！城城屋企車庫架架收藏都係限量版，法拉利、林寶、平治、幽靈之子，數之不盡，一班愛車男，望吓都好！
最近城城獲邀接拍迪士尼新餐廳廣告，拍攝當日，他更乘機晒珍藏，出動價值 788萬的私伙林寶堅尼助陣。揸住跑車埋位的他不停 chok pose，兩個字：型爆！
《寒戰》導演落場
今次廣告商好揼本，除動用七位數天價請郭富城拍廣告，仲搵埋《寒戰》導演陸劍青負責操刀。廣告情節需要動用一架跑車，廣告商原本打算租用法拉利，但城城主動提出用私伙。
「劇組搵咗架法拉利做道具，但城城睇過相覺得唔夠靚仔，寧願出私伙。佢架車咁貴，拍嗰陣刮花就麻煩，所以廣告商事先都買重保險㗎。」劇組工作人員透露。
被貢獻出來做道具車的林寶，被譽為「牛中之王」，是城城一四年送給自己的生日禮物；車廠更特別為他噴上墨綠專色，命名「 Aaron tone」，夠晒珍貴！這部戰車更曾獲城城「點燈」，在倫敦個唱登場。
差啲釀成意外
週日（十月三十日）晚，城城親自揸住架墨綠色林寶現身中環龍和道。到場後，工作人員即刻落手加工，將原本掛住的「 Aaron」車牌，換成「 JAN11」。
道具準備好，城城換上皮褸加黑超，單是造型，已經夠 chok；不過，第一個 shot就差點出事。城城要揸住戰車兜一圈，但落車時，他竟然唔小心入錯波，戰車失控流前，幸好城城反應快，即刻跳上車踩 brake，有驚無險！
拍攝到中段，在場圍觀市民愈聚愈多，最後劇組要圍上黑布封場，才可以繼續拍攝。
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|
