鍾嘉欣產後首度在香港出席公開活動，成為全場焦點。嘉欣受訪時，笑言自己從來講心唔講金：「我一定要嚟㗎，其實錢係其次，我唔講錢㗎。（幾耐之前應承出呢個活動？）一個月前。（湊女生活點？）好開心。（有冇蝦碌嘢？）冇咩蝦碌，我係幾冷靜嘅媽咪。（順產定開刀？）我係順產。（十級痛喎 ）你都做得到㗎！忍到㗎！我做媽咪好開心，其實開頭好辛苦，因為好唔適應，餵人奶又好辛苦，過咗兩個星期度開始適應，一個月之後就好好多喇。」
滿意收身成績
嘉欣又謂愈來愈了解自己個女：「個B我又開始了解佢，知道佢喊咩意思，佢好少扭計，好鍾意笑，瞓得好、食得好。（有冇人幫你？）我自己一個做晒㗎！（咁咪唔夠瞓？）坐月嗰陣我冇乜點瞓覺，因為佢每個鐘都喊。頭嗰個月嘅BB真係咁㗎，大咗就好啲。係要兩個鐘餵一次奶，但我個B成日都喊，所以成日要理佢，好眼瞓。不過佢依家瞓到八個鐘呀！（你嚟香港有冇揼定奶？）我揼咗26樽100毫升嘅奶。（身材有冇變化？）餵人奶...係快咗收身，好快呀！我讀BB科，話餵人奶每次減到15個卡路里，每次喎，咁一日餵幾次咪瘦好多咯！」
佗B增35磅
嘉欣又謂佗B高峰期比正常體重重了35磅：「依家爭少少去番正常體重，我懷疑係奶嘅重量，我懷疑我已經變番正常。（老公幫手湊？）佢有。（老公有冇話追多個？傳聞你追六個？）作㗎咋，湊咗佢一年先啦，我依家未係完全康復晒，生完B嘅媽咪要好長時間先好番，一定要養好身體先。（未來工作）暫時做少少活動咁咯，未確定。（係咪因為囡囡放低晒工作？）做媽媽要負責任㗎嘛，生完出嚟個生活係要照顧佢，唔可以揼低佢。（呢兩日第一次揼低佢？）我冇揼低佢呀！（第一次分隔兩地？）佢大個咗喇，我係真係好掛住佢。（你將來會否虎媽？）我唔緊張㗎！（有冇視像？）有視像，我真係好掛住，因為佢係我個女嚟㗎嘛。」
冇得拍《溏心3》感可惜
嘉欣又坦言未能接拍《溏心3》後可惜：「我係好想拍㗎，因為《溏》帶畀我好多嘢，所以我好想拍。但我有個女，我個女真係現時係我嘅第一位，所以我要好好照顧咗佢先。（依家主要喺溫哥華生活？）我冇諗咁遠。總之短時間嘢當然可以做，但長時間喺香港嘅工作就要好好計劃。先生好支持我，由拍拖開始佢已經好支持我，佢一早知我哋將來會飛嚟飛去，我又覺得飛嚟飛去冇乜嘢。（今次見唔到啲姊妹喎？十二月再聚會？）我唔知幾時返，因為啲工作未落實。雖然今次見唔到，但唔係要成日見㗎嘛，我哋成日傾電話，所以唔緊要啦～！」
|
鍾意就快D Share啦！
|
|
|
