娛樂偵訊
樂大媽翻身反擊 「余黨」洪永城蕭正楠受辱做後排布景
上週邵氏影業大龍鳳，大台出動逾百藝人助威。近日因為監製電影版《使徒行者》在內地大收，樂易玲得以鹹魚翻生，為宣示反彈勢力，大媽硬塞人氣唔夠秤的愛將企頭排，其他大台小生花旦，統統借歪。
屬於余詠珊一黨的洪永城及蕭正楠更加冇運行，被掟去第五排之餘，仲要呆企近一粒鐘，洪永城唔面黑就假嘅。
神奇插位
由曾勵珍鬥到余詠珊，藝員部的樂易玲一直是大台《宮心計》真實版核心。早年珍姐同方丈聯手，大媽在大台完全失勢，忍辱偷生，幸六嬸出手打救，安排她主理邵氏電影，保住份工。
時來運到，暑假電影《使徒行者》在內地收七億票房，身為監製的樂大媽，即鹹魚翻生。上週，在邵氏影業晒冷記者會中，「樂派」藝員「離奇」企好位，擺明向死敵余詠珊摑一巴。
當日排位相當神怪！點秤都唔夠班的梁烈唯、阿 Bob、坤哥、阮兆祥、及簽了給王祖藍的林欣彤，因為全是樂字派，竟得以超越近期吃香的小生花旦陳展鵬、胡定欣、田蕊妮、黃宗澤等人，跟「邵氏兄弟」主席黎瑞剛及一眾大台老臣子 Do姐，叻哥企頭排，地位「超然」。
狄龍仔做男二
另外，企第一排的還有狄龍兒子譚俊彥，據了解，在樂易玲拉攏下，「龍之子」剛跟大台簽下部頭約；加上有邵氏出身的老豆狄龍光環，譚俊彥不單企靚位，更獲安排在即將開拍的清裝劇做男二。
被樂派人頂住，企第二排的陳展鵬、黃宗澤及胡定欣已經好冇癮，余黨的洪永城，黃翠如和蕭正楠，更加難受。當日，上位中的洪永城、蕭正楠，王浩信等小生被通知要一早到場，但在晒冷記者會上，眾人竟淪為第五行布景板，還要跟其他二、三線藝員一樣，在台上 stand by，企足五十分鐘。
余黨受氣
「企第五行嘅藝員，活動開始嗰陣係俾邵氏個布景板遮住，因為要等陳展鵬、胡定欣、田蕊妮同黎耀祥佢哋同老闆、高層先出場做祝酒儀式，活動最後幾分鐘，邵氏個布景板拉開，企第五排等咗接近一粒鐘嘅洪永城、蕭正楠同其他人先出場。
「嗰日洪永城塊面最黑，佢冇諗過，自己上緊位都會企得後過梁烈唯同坤哥咁多，加上見情敵馬明亦企得前過佢，又唔使 stand by咁耐，自己一早到仲要受氣，實嬲爆」知情者說。
撰文、攝影、攝錄：娛樂組
|
鍾意就快D Share啦！
|
|
|
