熱爆娛樂: 周杰倫香港十日　嫩妻昆凌跟實 [壹週刊

2017年1月19日星期四

周杰倫香港十日　嫩妻昆凌跟實 [壹週刊 - 1402] __,昆凌,周杰倫,M1,

探熱針

周杰倫香港十日　嫩妻昆凌跟實

台灣天王周杰倫九場《地表最強世界巡迴演唱會》上週開鑼，三年冇在港開騷，唔單止「 J迷」瘋狂，圈中名人都爭住去朝聖；門票更被「黃牛」黨炒高，原本$1,080的貴價飛，炒到四千蚊一張。

周董來港吸金，廿三歲嫩妻昆凌都做跟得夫人，上週四（一月十二日），周董唧出時間，同老婆拉大隊，操落銅鑼灣掃貨買買買。

血拼銅鑼灣

開騷連唱四晚，上週二，周董停唱休息抖一抖。下午四點幾，兩公婆現身銅鑼灣，二人均戴住黑色口罩，分開行又分車坐，表現避忌；但同行有超過十名工作人員和保安護駕，咁大陣仗，盲都見到！

一隊兵先殺入百德新街一間鋪頭仔，但逗留約十分鐘便離開，之後再操去附近的 I.T血拼。天王駕到，店內員工大為緊張，加派人手招呼 VVIP；而隨團兩名保安則守在店外，一見有人舉機，即大為緊張。不消廿分鐘，已見工作人員拎住周董的戰利品步出，兩公婆尾隨各自上車離開。

周杰倫來港開騷，嫩妻昆凌做「跟得夫人」。

兩公婆蒙晒面行銅鑼灣，身邊十幾人傍實，惹人注目。

掃完貨，一行人搵地方醫肚，周董第一時間問老婆意見。

歎完西餐，周董同昆凌前後腳離開餐廳，好避忌。

陪買俾意見

下一站， D-mop。今轉周董純陪買，昆凌在女裝部左揀右揀，他全程在旁俾意見。十五分鐘已經揀到心水，試都冇試，埋單走人。

過完手癮，輪到口癮！一行人最終決定在京士頓街一間西餐廳醫肚。到埗後，工作人員先入內視察環境，揀定一個最隱蔽的角位，才通知周董和昆凌落車，食唔夠一個鐘，昆凌率先上車走，過冇耐，周董便同助手離開，返回酒店休息。

結婚兩年，周董同昆凌十足十連體嬰。老公開工，昆凌十次有九次做「跟得夫人」，陪住周董四圍巡唱。今次留港十日，昆凌一直冇公開現身。

周董好貼心，陪老婆行女裝部兼埋單。

難得來港，昆凌順便過大海去澳門一日遊。

廣東話氹 J粉

結婚兩年，周董同昆凌火速造人，前年誕下女兒 Hathaway。

據知，周董開騷頭一晚，下午彩排時間昆凌已從秘密通道混進紅館後台，幫老公打點，至於一歲囡囡 Hathaway，始終未見出現。

「開騷第一日， Jay嫂嚟紅館嗰陣戴晒帽同囗罩同行得好急，一到就衝入後台化妝間，跟住就冇出過嚟，到差不多完場，佢又一支箭咁喺後門走咗。」一名工作人員透露。

九場演唱會場場爆到瀉，周董冇欺場，全晚唱足三十三首歌，換十套戰衣，又經常用半鹹半淡廣東話同現場觀眾傾偈，落力搞氣氛。 Encore部分，周董更特別苦練廣東話，唱出校長譚詠麟的《一生中最愛》冧 fans，誠意十足十。