一句「一巴打你埋牆」，多年宿怨，一點即着！今年82歲嘅曾江，同細兩年嘅謝賢(四哥)，前年合作拍旅遊節目《4個小生去旅行》，喺8月記招中，四哥使出一招「排雲掌」，打到曾江助聽器飛脫，連坐中間嘅胡楓亦遭殃，眼鏡半甩。怒氣難消嘅四哥，事後繼續爆粗狂轟拍檔……而被打嘅曾江，竟然未有以受害人姿態，控訴施暴者，反而心平氣和公開講：「大家係老朋友，我不是立心去傷害他，我只可以說我錯了，我不應該這樣做，希望他原諒我！」(新聞連結：http://bit.ly/2jVMNe3 )買咗成袋花生，點知剝唔夠幾粒。以往硬橋硬馬嘅曾江，肯低聲下氣向人道歉，改變嘅，除咗心境，當然身邊人亦居功唔少。曾江曾經講過，同老婆焦姣嘅22年婚姻中，自己底子性格雖然改唔到，但以往喺家中「稱霸」嘅佢，坦言如今「怕老婆」，會聽老婆話。日前(15日)，曾江同老婆焦姣，喺九龍城候王道辦年貨，80開外嘅曾江，雖然頭頂長滿白髮，但精神飽滿，紅光滿臉，外披迷彩外套，揹住背囊，腰板筆挺，健步如飛，雖有老態，但就絕冇龍鍾之感。曾江陪老婆行完一輪海味雜貨，買咗一袋年貨同餸菜，兩公婆就各自將餸菜放入環保袋，焦姣再入健康食品店掃貨，曾江就乖乖亦步亦趨跟實老婆。老人家，去吓街市、逛吓公園，飲吓早茶，生活，就係咁簡單！喺屋企落慣廚嘅曾江，以往鍾意重口味，o依家年紀大咗，少糖少鹽少油係屋企戒律，加上每日堅持適當運動量，難怪曾江做到，身老心不老！
| 攝影：朱志聰、黃曉程 | | |
| | | |
| | | |
| |
來源 source: http://s.nextmedia.com
|
鍾意就快D Share啦！
|
|
|