外型兇神惡殺，曾拍過唔少三級艷情片嘅徐錦江，大家又有冇諗過佢私下為人其實係文質彬彬嘅藝術家，師承已故嶺南畫派國畫大師關山月。佢師傅2012年喺拍賣會以3920萬人民幣賣出一幅《蝦球傳——山長水遠》連環畫，而徐錦江近年淡出娛樂圈，傾情於藝術，佢畫嘅畫一樣有價，有收藏家出到150萬想買走佢嘅《虬松勁羅衫濕》畫作，但徐錦江除咗係藝術家，仲係一個畫痴，而呢一刻，佢一張畫都唔捨得賣俾人。除咗畫畫，徐錦江仲涉獵寫大字、雕塑同整陶瓷，而佢最大心血就係建立自己嘅藝術園。上年開始，佢喺安徽蚌埠市龍子湖傍邊的同朋友合資興建藝術園，呢個藝術園投資金額約60億人民幣，徐錦江喺園裡面佔有錦江藝術中心、螞蟻咖啡館同錦江藝術酒店3個項目，個人總投資估計約5000萬人民幣，呢3個項目設計圖則有佢自己親手畫，建築材料同室內設計的飾品全部由佢一手操辨。為了訪問多年已移居北京嘅徐錦江，本報記者專程飛到去安徽蚌埠市走訪，當去到仲喺度建緊嘅錦江藝術中心時，見到徐錦江戴住安全帽指導工匠點樣整個地下時，覺得佢有建築師氣勢，同佢打完招呼，佢熱情地帶記者遊覽整個園地，為咗自己嘅心血，徐錦江仲專程由廣東移送百年古樹到園中種植，真係好大工程。
來源 source: http://s.nextmedia.com
|
鍾意就快D Share啦！
|
|
|