Timothy表示，早在大學期間已有創業打算，「唔想打一世工。」對於現時不少補習 app相繼推出，他直言「無有怕」。
財經人物
「打電話問功課」變奏版 日答 1萬條問題吸金
《 Startup擂台》自成立至今，先後採訪三十八個有志創業之士，當中不乏金融專才、名牌大學生，甚至是出名富二代。但創業難、守業更難，不少創業者雄心壯志，但發展不如理想，有些苦苦死守，有些決意轉型，希望覓得一條出路。
絕無僅有的成功個案，要數到由 N年前「打電話問功課」衍生而成的「 Snapask」。此 app以手機應用程式解答學生問題，吸納近五千名導師、十萬名學生使用，每月最高營業額過百萬。最近更獲騰訊主要創辦人及美圖（ 1357）董事長蔡文勝融資 300萬美金，有足夠「錢」景。
由打銀行工變身老闆的 Snapask創辦人余佑謙，大學二年級已與同學開設蚊型補習班。打工八個月即放棄滙豐基金管理部門工作，全職發展網上補習社生意。同學看淡，紛紛退場之際，竟被他殺出一條血路！
臨近中學文憑試，不少補習社都力推應試班，務求在這兩個月內盡吸應考生報讀。 Timothy不遑多讓，上月高峰時創下一日答過萬條問題的紀錄：「特別係呢兩個月，好多學生都要準備考試，但係我哋處理技術都比較完善，對上兩次（公開試）都冇死機情況發生！」有錢，就有實力，他亦暗寸其他經常「死機」的同類網站：「我哋同一時間可以接收過千條問題，一個正常用雲端服務嘅公司都會 support得到。」
打金融工向家人交代
畢業於香港大學計量金融及風險管理系的余佑謙（ Timothy），大學二年級時已經常「走堂」，跟朋友合資開補習社。畢業後雖獲滙豐聘請，但做了八個月就離職，全力發展網上補習社：「當時又返工，又去補習，有時仲要喺補習社瞓。嗰陣時已經諗緊點將佢轉型成網上生意。」他透露到銀行工作，不多不少只是對家人有個交代，「試過就算」：「份工做嘅嘢比較重複，冇乜挑戰性。嗰陣時賣咗間補習社都有廿萬，同其他同學分咗啲錢之後就諗點樣將補習放喺網上面搞。」
他聰明的地方，是沒有將「網上補習社」淪為網上宣傳渠道，又或只是在網上播放名師補習片，而是將網上互動問功課，變成一種新的生意模式。 Timothy自言對 IT一竅不通，有大半年一直探索如何實踐，其間都是靠積蓄生活：「嗰陣時理盤生意多過理自己，最初只係用 Facebook一問一答咁教學生，成本都唔高，之後先至搵人整咗個 app，一出街完全唔受歡迎。」
出增值卡吸學生
Timothy進而鋪條捷徑，就是夥拍大型補習社的導師合作，打響知名度：「我覺得線上同線下兩個市場係可以互補，可以等學生上完堂有唔明嘅地方，返到屋企可以即刻喺網上問到。」早前就試過與遵理三位名師 Inter Lau、 Louise Page、 Koopa Koo，合作舉辦網上 live問功課，更食正學生潮流，在補習社推出增值卡販賣，甚受學生歡迎。
但 Timothy畢竟後生，對敏感的補習社生態掉以輕心，結果得罪人。事關他曾與前英皇補習班名師 Arthur Kho合作，但其間為搵更多生意，找了遵理合作，惹來 Arthur Kho不悅及暫時終止合作， Timothy說日後自己會小心。
現時 Snapask主要收費分為每題及包月制，每十題收九十八蚊（限一個月內使用），另設一個月收五百八十八蚊任問。主要支出為老師抽佣（佔兩至三成）、 app開發及維護（佔兩成），另扣除租金及人工等，每月利潤約佔營業額兩成半：「要睇番當個月多唔多學生問，因為香港嘅學生多數包月，如果考試季節，包月學生問得多，我哋就要分得多啲錢俾老師。」他補充當初投資額只有十多萬，早已回本，現時主要運用集資資金。香港生意佔六成左右，台灣及新加坡分別佔兩成半及一成，他以上年十二月營業額三百五十萬港元計算，估計公司單月盈利已近八十七萬元。
補習題大數據
由於用戶數量上升，加上除了數學科外，學生不時都有要求解答語文及通識等題目， Timothy着手以大數據分析學生問題：「我哋記錄各同學的學習過程，當知道佢哋集中問咩問題，就可以了解到佢哋喺邊一個 concept上係遇到困難，如果有部分嘢係特別多人唔識，好似機率、統計嗰方面，我哋就會喺嗰方面提供多啲延伸資料，幫到佢哋進步。」同一時間，他亦就此向導師提供免費教材，讓他們更快掌握同學難題，加快解答流程。
中學生是獨特市場，對於現時不少企業都喜歡在 Facebook落廣告，他卻指：「中學生都唔玩 Facebook啦，我都要成日問佢哋依家識玩啲咩，好似 Instagram咁，好似之前有個補習天王教念力嘛，我哋咪整張圖抽吓水，話用念力俾你問功課咁，同學生傾開偈，佢哋都會提番。反而我整啲 coupon落去，學生反應都未必咁好！」
棄強國市場有因
問功課 app現時以香港、台灣及新加坡發展為主，未來主要集中進軍亞洲其他市場，甚至考慮歐洲國家的可行性。問到為何不考慮內地，他就指：「大陸係一個好特別嘅市場，本身都有同類型嘅產品。最大問題都係嗰邊學生都鍾意係直接拎答案，而我哋個 app係想改變學生嘅學習方式，唔會直接俾答案，而係要一步步咁同學生討論，所以我哋唔會考慮。」
以往不少企業都喜歡以大額投資「燒錢」，務求令初創公司在短時間爭取市場份額。但由於開支太大，回報亦遠遜預期，近期不少公司已「縮沙」，導致初創公司在籌集資金方面難上加難。 Timothy就指，要令大公司肯融資：「首先要有一個穩定嘅發展，好似用戶數量有無上升，係唔係已經有盈利，產品可唔可以改變成個市場，先會決定投唔投資，已經不只是有遠景那麼簡單！」
Startup轉型搏翻身
FeedMe Guru
兩名哈佛商學院 MBA畢業生 Dominic及 Kelvin，為打低劣評如潮的 OpenRice，開設「真」食評 app FeedMe Guru。但發展一年，由於模式未如理想，決定轉型，將 app化身為美食版 Airbnb，主力推介餐廳招牌菜，更設獨有點餐服務，暫時成功轉型，由長期無收入變成賺錢。
MARK Beauty
曾在渣打與「小飛俠」林燕玲做同事的 Lawrence，為理想「降呢」做 IT，開設專為美容院預約的「 MARK Beauty」，但數月後就發現市場太細，收入難以提升。於是決定向其他方面埋手，發展 Facebook自動對答訂位系統，暫獲太古集團旗下餐廳使用。
Clipper
在一五年八月介紹的優惠券 App Clipper，記者發現自上年開始官方 Facebook已經關閉，亦已在 app store下架。 Ryan回覆指整個 app已經賣給第三方：「簽咗保密協議唔方便講，（賣盤）係同 partner嘅決定，依家都係做緊 app。」對於公司未來發展， Ryan亦不願透露。
撰文：梁延宇
攝影：廖健昌
ed_bn@nextdigital.com.hk
|
鍾意就快D Share啦！
|
|
|
