名人動態
以酒會友 四年賠上健康 劉晨芝飲到嘔血！
首個華人女歌手打入美國 Billboard流行榜頭二十位的劉晨芝， 08年由美國回港出過一張唱片後，突然轉去開夜店食肆，以酒會友四年，儲下不少名人明星捧場客；但同時賠上健康，早前更捱出病，狂嘔吐血。
身體發出警號，要節制不可再亂飲亂食的劉晨芝，又有另一番領悟，聲稱要繼續行她的演員路。
一晚飲幾支
父母在美國，在香港過年的劉晨芝一個人在家，覺得身體唔舒服嘔了好幾次，最後更吐埋血，嚇得她馬上去看急診。醫生說，幸好血的顏色唔深，並不是內出血現象。
「我一三年開始搞夜店，飲足咁多年！我本身緊張自己生意，開夜店，好多朋友捧場，加上我鍾意熱鬧，如果唔係唔會揀做飲食（在中環有韓國餐廳）、酒吧。
「朋友落到嚟，我會好開心一齊飲；最高紀錄都幾誇張，有次我生日開咗一百支香檳。每個 friend飲一啖，如果杯杯清就真係死得。」嬌小玲瓏的劉晨芝唔夠九十磅，最高紀錄一晚喝掉幾支香檳，是極限。
夜店被非禮
過去幾年，在夜店目睹不少客飲大幾杯開拖打交、亦有一晚花幾十萬開酒嘅豪客；見到場面失控，便要看形勢隨時閃，不過也有走唔切的時候。
「有晚個客飲到貓晒，竟然非禮我，朋友見到即刻㩒住佢，但對方仲死撐話大家屈佢，我話可以攞 CCTV做證明，之後趕咗佢走；隔咗一陣，佢帶住班人衝入嚟，我同啲 bouncer（夜場保安）梗係阻止，唔通報警咩！第二日對方搵中間人向我道歉，話唔知發生咗咁多事。唔通捅人一刀，又話唔記得？」劉晨芝憶述。
結束夜店的生意後，前年劉晨芝再跟朋友合作開韓國餐廳，朋友來捧場，她便以韓國燒酒待客，積累四年酒精生活，終於飲出血來。
父母反對
身體不勝負荷，時至今日，如無必要，劉晨芝不會返餐廳做生招牌。不過，還有一個原因，是最近看完電影《星聲夢裡人》後得出的想法。
「套戲刺激到我諗番起自己一直夢想做演員！其實之前突然學做生意，係因為覺得藝人好被動，想做一啲自己可以控制嘅事。」
因為父母反對，所以當年在 UCLA她只能選擇副修 Acting，其後在美國拍過一部電影，亦因為導演將她介紹給唱片公司，因而做了多年歌手。
「好感恩當時有機會，學到好多。華人女仔喺美國樂壇受歧視，出到第三張碟，唱啲比較 urban嘅 music，好多時會喺黑人 community表演！有啲黑人女仔好激動，想走埋嚟打我。」餐廳上了軌道，劉晨芝說是時候放低，將生意交給同事打理，讓自己繼續她的演員夢。
撰文、攝影、攝錄：娛樂組
|
鍾意就快D Share啦！
|
|
|
